АҚШ президенти Доналд Трамп Россия президенти Владимир Путиннинг АҚШга келишини «ҳурмат ифодаси» деб баҳолаб, Аляскадаги учрашувни дастлабки музокаралар сифатида кўради. Унинг сўзларига кўра, икки дақиқа ичида Путиннинг келишувга тайёр ёки тайёр эмаслигини англай олади ва кейинроқ Украина президенти Володимир Зеленскийга қўнғироқ қилади.
Трамп Зеленскийнинг конституция ҳудудий алмашувга йўл қўймаслиги ҳақидаги сўзларини танқид қилиб, «унга уруш қилиш мумкин, лекин ҳудуд алмашиш мумкин эмасми?» дея савол берди. У Россия қимматли ҳудудларни, асосан денгиз соҳилларини эгаллаганини, уларнинг бир қисмини Украинага қайтаришга ҳаракат қилишини билдирди.
Президент Россиянинг Наполеон ва Ҳитлер устидан қозонган ғалабаларини ёдга олди ва Венгрия бош вазирининг Россияни урушда мағлуб этиш мумкин эмаслиги ҳақидаги фикрини келтирди.
Шунингдек, Трамп рус танклари Киевга 4 соатда етиб бориши мумкинлигини, аммо нотўғри йўналиш танлангани учун лойга ботиб қолганини айтди. Трампнинг сўзларига кўра, Путин бу қарор учун масъул генерални энди ҳеч қандай буйруқ бериш ҳуқуқидан маҳрум қилган.
Афтидан, трамп 2022 йилда «Восток» гуруҳини бошқарган генерал-полковник Александр Чайко ҳақида гапирган. У ўша йили май ойида лавозимидан четлатилган, 2024 йил декабрида эса Суриядаги Россия қўшинлари қўмондони бўлиб, бу минтақада ҳам назоратини йўқотган.