АҚШ президенти Доналд Трамп маъмурияти Украина президенти Владимир Зеленский ва Россия президенти Владимир Путин иштирокидаги уч томонлама музокаралар учун жой изламоқда. Бу ҳақда CBS News манбаларга таяниб хабар бермоқда.
Манбаларнинг айтишича, Вашингтон, Киев ва Москва ўртасидаги музокаралар келаси ҳафта охирида ўтказилиши кутилмоқда.
Телеканал бошқа тафсилотларни келтирмаган. Илгари учрашувга тайёргарлик кўрилаётгани ҳақида маълумот берилмаган эди.
Доналд Трамп ва Владимир Путин Алясканинг энг йирик шаҳри Анкориждаги Элмендорф-Ричардсон ҳарбий базасида музокаралар ўтказадилар. Саммит 15 августга белгиланган.
Шунингдек, Трамп Владимир Зеленский иштирокида уч томонлама учрашув ташкил этишни режалаштирганини айтган. Путин эса август ойи бошида Украина раҳбари билан учрашишга қарши эмаслигини, бироқ аввал «муайян шароитлар яратилиши» кераклигини, ҳозирча эса бунга «вақт борлигини» таъкидлаган эди.