Politico нашрининг ёзишича, 15 август куни АҚШ президенти Доналд Трамп ва Россия президенти Владимир Путин ўртасида ўтадиган музокаралар арафасида Украина президенти Володимир Зеленский Европа иттифоқчилари билан биргаликда Киев ҳимоя қиладиган «қизил чизиқлар»ни белгилади.
Биринчи талаб — ўт очишни узоқ муддатга тўхтатиш, бу шарт бажарилмасдан ҳеч қандай ҳудудий масала муҳокама қилинмайди. Зеленскийнинг таъкидлашича, Украина ўз конституцияси ва халқаро ҳуқуқ билан кафолатланган чегараларидан воз кечмайди. Унинг фикрича, агар Россия Донбасни эгалласа, бу янги ҳужумлар учун плацдармга айланади.
Иккинчи талаб — уруш туфайли етказилган зарар учун моддий компенсация, баҳоларга кўра, 500 млрд доллардан 1 трлн долларгача.
Учинчи талаб — хавфсизлик кафолатлари сифатида НАТО ва Европа Иттифоқи аъзолиги, бу Россиянинг қайта ҳужум қилиш эҳтимолини бартараф этадиган ягона йўл сифатида кўрилмоқда.
Тўртинчи талаб — Россияга олиб кетилган украин болаларини, фуқаролик асирларини ва ҳарбий маҳбусларни қайтариш. Зеленский ва Европа раҳбарлари бу талаблар Путинни келишувдан кейин қайта гуруҳланиб, яна ҳужум қилиш имкониятидан маҳрум қилишини умид қилмоқда.
Sky News манбаларига кўра, Европа Иттифоқи мамлакатлари тинчлик келишуви имзоланган тақдирда Россияга қарши санкцияларни босқичма-босқич юмшатиш имконини кўриб чиқмоқда. Режага кўра, 15 кунлик оташкесим даврида санкциялар сақланиб қолади, келишув бузилса эса қайта жорий этилади.
Axios’нинг ёзишича, Зеленский ва ЕИ раҳбарлари Трамп Путиннинг қаттиқ талабларига рози бўлишидан хавотирда. Бироқ манбалар Трамп ҳали ҳам Путинга нисбатан қаттиқ позицияни сақлаётганини таъкидламоқда. АҚШ молия вазири Скотт Бессентнинг сўзларига кўра, агар учрашув ижобий натижа бермаса, Трамп Россияга қарши янги санкциялар ёки иккиламчи тарифлар жорий этишни истисно қилмайди.