АҚШ президенти Доналд Трамп Владимир Путинга мурожаат қилиб, агар у 15 август куни Аляскада ўтадиган саммитда Украинадаги жанговар ҳаракатларни тўхтатишдан бош тортса, уни «жуда жиддий оқибатлар» кутиши ҳақида огоҳлантирди. Бу ҳақда у журналистлар саволига жавобан айтиб, Оқ уй учрашув ёзувини эълон қилди.
Трампнинг айтишича, агар Путин билан музокаралар муваффақиятли якунланса, у президент Володимир Зеленский иштирокида уч томонлама учрашув ўтказишга тайёр. «Биринчи учрашув яхши ўтса, мен дарҳол иккинчисини Путин, Зеленский ва мен иштирокимда ўтказишни хоҳлардим», — деди у. Шу билан бирга, у керакли жавобларни олмаса, кейинги учрашув бўлмаслигини қўшимча қилди.
АҚШ раҳбари Путинни урушни тўхтатишга ишонтириш имкониятига шубҳа билдирди. «Жавоб эҳтимол кўпроқ «йўқ» бўлади, чунки мен Путин билан яхши суҳбатлар ўтказганман, лекин уйга қайтсам, ракета тураржойни нишонга олгани ва одамлар қурбон бўлганини кўраман», — деди Трамп. Шу билан бирга, у Зеленский ва Европа етакчилари билан кечаги мулоқотини «10 баллдан 10» деб баҳолади.
АҚШ молия вазири Скотт Бессент музокаралар самарасиз якунланса, Вашингтон Россияга нисбатан тўғридан тўғри санкцияларни кучайтиши ва Москва савдо ҳамкорларига нисбатан иккинчи даражали тарифларни ошириши мумкинлигини билдирди. У Европа давлатларини ҳам шундай чораларни жорий этишга чақирди. Бессентга кўра, санкциялар музокара натижасига қараб кучайтирилиши, юмшатилиши ёки вақтинча жорий этилиши мумкин.
Саммит олдидан Трамп Зеленский ва Европа етакчилари билан видеоконференция ўтказди. Зеленскийга кўра, АҚШ президенти Киевга Россия билан бўлиши мумкин бўлган тинчлик келишуви доирасида хавфсизлик кафолатларини беришга тайёрлигини билдирди. Франция президенти Эммануэл Макрон эса, Трамп ҳудудий масалалар Украина иштирокисиз муҳокама этилмаслигини таъкидлаганини маълум қилди.