Ўзбекистон футбол ассоциацияси миллий терма жамоа яқинда ўтказиладиган ФИФА Жаҳон чемпионатида илк бор 7SABER бренди либосларида иштирок этишини маълум қилди. Бунга қадар жамоа 2018-йилдан бери Германиянинг JAKO компанияси ишлаб чиқарган либосларда майдонга тушиб келаётган эди.
Ўзбекистон Миллий олимпиада қўмитаси раиси биринчи ўринбосари Отабек Умаров терма жамоа учун бу қарорнинг тарихий аҳамиятга эга эканини таъкидлаб, катта мусобақаларда юрт шарафини 7SABER либосида ҳимоя қилишга тайёр эканини билдирди. Унинг сўзларига кўра, миллий жамоа катта мақсадлар ва ғалабалар сари қадам қўймоқда.
7SABER тақдим этган видеороликда кўрсатилишича, янги либослардаги асосий ранглар ўзгаришсиз қолади — уй ўйинлари учун оқ, сафар ўйинлари учун эса кўк ранг сақланади. Бу услуб миллий жамоанинг анъанавий имижини сақлаб қолади.
7SABER бренди аввал ҳам спортчилар учун либос тайёрлаш тажрибасига эга. Хусусан, компания 2021-йил Токио ва 2024-йил Парижда бўлиб ўтган ёзги олимпиада ўйинларида қатнашган ўзбекистонлик спортчиларни спорт кийимлари билан таъминлаган.
Маълумот учун, 7SABER бренд тарихи 2019-йил бошига бориб тақалади. Бренд рамзи Отабек Умаров томонидан яратилган график элемент ҳисобланади.