Лойиҳага кўра, жисмоний шахсларга кредит ажратишда тўртта асосий шарт кўрсатилган чек-лист жорий этилади. Унда:
Кредит харажат эканлиги;
Тўлов жадвалини ўрганиб чиқиш;
Даромаднинг етарлилиги;
тўловни кечиктириш оқибатларидан хабардорлик каби пунктлар мавжуд бўлади.
Чек-лист қарз мақуллангандан кейин, лекин шартнома имзоланишидан олдин тақдим этилади. Қарз олувчи ҳар бир бандини ўқиб, махсус белги қўйиб ва имзо чекқандан сўнггина шартномани имзолаш мумкин бўлади. Масофавий хизматларда эса барча пунктлар электрон белги билан тасдиқланиб, сана, вақт, IP-мазил ва идентификаторлар банк тизимида қайд этилади.
Лойиҳада банклар мижоз розилигисиз кредит параметрларини мобил иловага автоматик юклаш ва «стандарт» розилик тугмаларидан фойдаланиши тақиқланиши белгиланган. Шартларни қабул қилиш тугмаси ҳужжат охиригача ўқилгандан кейин фаоллашиши лозим.
Шунингдек, банклар мижоз молиявий қийинчиликка дуч келганда кредит шартларини ўзгартириш ёки реструктуризация қилиш тартибини ишлаб чиқиб, расмий сайтида эълон қилиши шарт бўлади.