АҚШ президенти Доналд Трамп Путин билан учрашуви натижалари бўйича Fox News телеканалига берган интервюсида айтган асосий гаплари:
Унинг сўзларига кўра, Украинадаги низони ҳал қилиш имконияти ҳозир Зеленский ва Европа давлатларининг қўлида.
Трамп Зеленский Россия билан можарода кўп нарсадан айрилганини тан олиши зарурлигини таъкидлади. У Киевга Москва билан келишув йўлини топишни тавсия қилди. Шу билан бирга, Трамп Россияни кучли давлат деб баҳолаб, Украина унга тенглаша олмаслигини очиқ айтиб ўтди.
У Путин билан ўтган музокараларда сезиларли илгарилашга эришилганини ва Украина бўйича келишув тузилиши эҳтимоли юқори эканини билдирди. Трампнинг фикрича, можаро тугаши ҳам Путин, ҳам Зеленский учун катта ютуқ бўлади.
Трамп Европа давлатлари Украина масаласини ҳал қилишда фаолроқ иштирок этиши кераклигини таъкидлади. Унинг айтишича, бу жараёнда АҚШ ҳам катта рол ўйнайди, аммо Европа ўз масъулиятини ҳам зиммасига олиши шарт.
Шунингдек, Трамп Россиянинг кучли ядровий салоҳиятини эслаб, бу омилни ҳеч қачон унутмаслик кераклигини қўшимча қилди. У ўзини келгусида Путин ва Зеленский учрашувида иштирок этиш имкониятини ҳам истисно этмади.