Европа Иттифоқи етакчилари АҚШ президенти Доналд Трамп ва Россия раҳбари Владимир Путин учрашувидан сўнг қўшма баёнот эълон қилди. Ҳужжат ЕИ Комиссияси сайтида 16 август куни жойланди.
Баёнот Франция президенти Эммануэл Макрон, Италия бош вазири Жоржиа Мелони, Германия канцлери Фридрих Мерц, Британия бош вазири Кийр Стармер, Финландия президенти Александр Стубб, Полша бош вазири Доналд Туск, Еврокенгаш президенти Антониу Кошта ва Еврокомиссия президенти Урсула фон дер Ляйен имзоси билан чиқарилган.
Европа лидерлари Трампнинг Украинадаги қурбонликларни тўхтатиш ва Россиянинг тажовузкор урушини бартараф этиш бўйича саъй-ҳаракатларини олқишлади. Уларга кўра, кейинги қадам Украина президенти Володимир Зеленский иштирокида кенгайтирилган музокаралар бўлиши лозим. Аввалроқ Трамп Зеленский билан 18 август куни Вашингтонда учрашиши кутилаётгани маълум қилинган эди.
Европа Иттифоқи етакчилари АҚШ ва Украина раҳбарлари билан биргаликда Европанинг қўллаб-қувватлови остида уч томонлама саммит ўтказишга тайёр эканини билдирди. Шу билан бирга, Украина суверенитети ва ҳудудий яхлитлигини ҳимоя қилиш учун аниқ хавфсизлик кафолатлари зарурлиги таъкидланди.
Баёнотда қайд этилишича, Украина қуролли кучлари ва унинг учинчи давлатлар билан ҳамкорлиги чекланмаслиги шарт. Шунингдек, Россия Киевнинг Европа Иттифоқи ва НАТОга қўшилиш йўлида ҳеч қандай вето ҳуқуқига эга эмас.
Европа етакчилари ўз позициясини яна бир бор мустаҳкамлаб, Украинани қўллаб-қувватлашни давом эттиришини ва Россия иқтисодиётига нисбатан санкциялар кучайтирилишини билдиришган. Уларнинг таъкидлашича, мақсад — адолатли ва барқарор тинчликка эришиш.