The New York Times нашрининг ёзишича, иқтисодий ўсиш суръати кутилаётгандан анча паст бўлиб, бу савдо уруши ва кўп йиллик кўчмас мулк инқирозининг таъсири билан изоҳланмоқда. Ҳукумат заводлар фаолиятини ҳам атайлаб чекламоқда, чунки кўплаб давлатлар Хитой экспортига тарифлар жорий этди.
Расмий маълумотларга кўра, июлда ишлаб чиқариш ўсиши ўтган йилга нисбатан 5,7 фоиз бўлиб, июндаги 6,8 фоиздан паст кўрсаткич қайд этилди. Чакана савдо эса атиги 3,7 фоизга ўсди. Бозор кутган кўрсаткичлардан анча паст бўлгани ички талаб сустлигини кўрсатмоқда. Шу билан бирга, ёш битирувчилар орасида ишсизлик ўсмоқда.
Шу билан бирга, экспорт 7,2 фоизга кўтарилди. Айниқса, Жанубий-Шарқий Осиё ва Африкага етказиб бериш кучайган. АҚШга тўғридан тўғри экспорт пасайган бўлса-да, Хитойнинг АҚШ билан савдосида салоҳиятли устунлиги сақланиб қолмоқда.
Миллий статистика бюроси вакили Фу Линҳуэй глобал протекционизм ва АҚШнинг бир томонлама чораларини асосий хавф омиллари сифатида тилга олди. Шунингдек, хаво-ҳавонинг кескин ўзгариши — кучли ёғингарчиликлар ва жазирама тўлқинлари ҳам иқтисодиётга салбий таъсир кўрсатгани қайд этилди.
Иқтисодчиларнинг фикрича, ҳукуматнинг талабни рағбатлантириш чоралари ҳозирча аҳолининг харажатларини сезиларли оширишга етарли эмас. Айниқса, уй-жой бозоридаги қийинчиликлар истеъмолчиларни йирик сарф-харажатлардан тийиб турибди.