Украина реал хавфсизлик кафолатларига эга бўлиши шарт, улар эса амалда ишлаши ва НАТОнинг бешинчи моддаси каби ҳимоя механизмларини таъминлаши лозим. Бу ҳақда Украина президенти Володимир Зеленский Европа комиссияси президенти Урсула фон дер Ляйен билан биргаликда ўтказилган матбуот анжуманида таъкидлади.
Зеленскийнинг сўзларига кўра, Украина Европага интеграция жараёнини хавфсизлик кафолатларининг ажралмас қисми сифатида кўради. У мамлакатнинг Европа Иттифоқига қўшилиши Киев учун геосиёсий барқарорлик ва узоқ муддатли хавфсизликни таъминлайди, деб ҳисоблайди.
«Хавфсизлик амалда ишлаши, НАТОнинг бешинчи моддаси каби кучга эга бўлиши керак. Шу боис биз Европа Иттифоқига қўшилиш жараёнини хавфсизлик кафолатлари тизимининг бир қисми деб қараяпмиз», — деди Зеленский.
Шунингдек, Украина раҳбари АҚШ президенти Доналд Трамп ва Россия президенти Владимир Путин ҳам бу масалада яқин нуқтайи назарга эга эканлигини қўшимча қилди. Унинг таъкидлашича, АҚШ ҳамда Европа мамлакатлари Украина хавфсизлиги масаласида бирлашган ҳолда ҳаракат қилиши лозим.
Зеленский Европада Украина ва Молдова масаласида бўлиниш йўқолиши зарурлигини қайд этди. Унга кўра, агар бундай бўлиниш юзага келса, бу Европа Иттифоқининг хавфсизлик бўйича умумий ва қатъий позицияси мавжуд эмаслигидан далолат бериши мумкин.