Бу ҳақда АҚШ давлат котиби Марко Рубио NBC телеканалига берган интервьюсида сўзлаб берди. Унинг сўзларига кўра, бу Россия ҳар куни «жуда қаттиқ санкциялар» оқибатига дуч келаётганининг бир намунаси ҳисобланади.
«Руслар Аляскага қўнганда, уларга ёнилғи қуйиш керак бўлди. Улар ўз самолётларини ёнилғи билан таъминлаш учун нақд пул билан тўлашни таклиф қилишга мажбур бўлишди, чунки улар бизнинг банк тизимимиздан фойдалана олмайди», — деди сиёсатчи.
Немис нашри Bild эса, ўз навбатида, Владимир Путиннинг президент бортидан ташқари, АҚШ ҲҲК Элмендорф-Ричардсон авиабазасига (Анкориж) яна бир нечта самолёт қўнганини ёзади. Улар орқали Россия журналистлари ҳамда Путин ва унинг делегацияси учун автомашиналар Аляскага етказилган. Bild ҳисоб-китобларига кўра, фақат президент бортининг ўзи тўлиқ ёнилғи билан таъминланиши учун, бак ҳажми 152 620 литр бўлгани сабабли, Россия делегациясига нақд пулда 85 минг АҚШ доллари (72 611 евро) тўлашга тўғри келган.
Рубионинг таъкидлашича, Доналд Трамп маъмурияти Россияга нисбатан янги чекловлар жорий этмаган бўлса-да, аввалги санкциялар тўлиқ кучида қолмоқда. Унга кўра, россияликлар ҳар куни ушбу чекловларнинг оқибатларини ҳис қилмоқда, аммо улар ҳалигача Украинадаги уруш йўналишини ўзгартирмаган.
Сиёсатчи янги санкциялар жорий этишнинг самарадорлигига шубҳа билдирди. Унинг фикрича, бу каби чекловлар дарҳол таъсир кўрсатмаслиги мумкин, балки ойлар ва йиллар давомида амал қилади. Шу боис Вашингтонда санкциялар орқали Россияни тезкор тарзда қурол ташлашга мажбур қилиш имкони йўқ, деган қараш устун келмоқда.
Рубиога кўра, янги чекловлар эълон қилиниши тинчлик музокараларини тўхтатиши мумкин эди. Унга кўра, агар Вашингтон қўшимча санкциялар киритса, Россия билан мулоқот қилишга тайёр бўлган ҳамкорлар қолмаслиги эҳтимолдан холи эмас.
Путин Аляскада тахминан беш соат бўлиб, Доналд Трамп билан биргаликда матбуот анжуманида қатнашди. АҚШ президенти келишувларга эришилмаганини айтди. Бироқ медиа тарқатган хабарларга кўра, Москва Трамп орқали Киев билан муҳокама қилиниши мумкин бўлган таклиф берган.
18 август куни Доналд Трамп аввал Володимир Зеленский билан алоҳида учрашади, кейин эса Европа раҳбарлари билан саммит ўтказиши белгиланган. Учрашувда Европа комиссияси президенти, НАТО бош котиби, шунингдек, Франция, Финляндия, Буюк Британия ва Германия етакчилари иштирок этади. Зеленский аллақачон Вашингтонга етиб келган.