Брент маркали нефт баррел нархи 66 доллардан пастга тушди. Сўнгги икки ҳафта ичида дунё бозорида нефт нархи кескин ўзгармай, деярли бир хил оралиқда қолган. Мутахассислар фикрича, агар томонлар келишувга эришса, Россия нефти экспортига қўйилган айрим чекловлар олиб ташланиши мумкин.
Трамп Зеленский билан Оқ уйда учрашгач, Путин билан телефон орқали гаплашди ва уни юзма-юз учрашувга чақирди. Бу ташаббус, Трампнинг яқинда Аляскада Путин билан учрашиб, «урушни тугатиш масъулияти Украина зиммасида» деган гапидан кейин Киев учун муҳим бурилиш сифатида кўрилмоқда.
Жорий йил бошидан бери нефт нархи 10 фоиздан кўпроқ тушиб кетди. Сабаби — АҚШнинг савдо сиёсати бўйича хавотирлар ва ОPEC+ давлатларининг ишлаб чиқаришни кўпайтириши. Украина бўйича олиб борилаётган музокараларнинг нархларга қандай таъсир кўрсатиши эса ҳозирча номаълум.
«Бозор ҳозирча кутиш режимида қолади. Урушни тугатиш йўли очилди, лекин бу тез бўлмайди», — дейди Vanda Insights компанияси асосчиси Вандана Ҳари.
Дипломатик ҳаракатларга қарамай, уруш давом этмоқда. Украина Россиянинг Европага муҳим бўлган «Дружба» нефт қувурига зарба берганини маълум қилди. Россия эса Украинадаги нефт заводига ҳужум қилган.
Август ойида бозор кўрсаткичлари жонланди. АҚШнинг Мексика қўлтиғида нефт барреллари охирги ойларнинг энг юқори нархида сотилмоқда. Шу билан бирга, АҚШ нефти Брентга нисбатан апрелдан буён энг катта чегирма билан савдога чиқмоқда. Бу яқин ҳафталарда экспорт ҳажмининг ортишидан дарак беради.
Украина бўйича дипломатик музокаралар нархларнинг қисқа муддатда пасайишига таъсир қилмоқда. Аммо уруш тугамагунча бозор барқарорлиги кафолатланмайди.
Ўзбекистонда, аксинча, бензин тобора қимматлашмоқда
Бутун дунёда нефт нархи 10 фоиздан ортиқ арзонлади, бироқ Ўзбекистон бунинг тескари содир бўлди. Стандартларга жавоб бермайдиган АИ-92 нархи тоннасига 13 млн 66 минг сўмга ошган эди. Аниқроғи, 1 литр 92 бензин нархи камида 10 минг 700 сўмгача кўтарилди. Ҳаттоки, айрим АЁҚШларда АИ-80 бензиннинг нархи 9 минг сўмга етган. Яъни 11-12 фоизга қимматлади.
«Учта нарсага чексиз қараб туриш мумкин: cувнинг оқишига, оловнинг ёнишига ва нефт нархи тушганда Ўзбекистонда бензин қимматлашишига», — дейди иқтисодчи Отабек Бакиров блогида.
Эслатиб ўтамиз, аввалроқ Ўзбекистондаги бензин нархлари Марказий Осиёдаги энг баланд кўрсаткичлардан бири эканини маълум қилган эдик.
Маҳлиё Ҳамидова тайёрлади