Путин Зеленский билан Москвада учрашмоқчи — ОАВ

20:40 | 3 дақиқада ўқилади.

Бу таклиф АҚШ президенти Доналд Трамп билан 18 август куни бўлиб ўтган телефон суҳбати давомида тилга олингани айтилмоқда.

Zelensky 2

Россия Федерацияси президенти Владимир Путин Украина президенти Владимир Зеленский билан учрашувни Москвада ўтказишни таклиф қилди. Бу ҳақда Agence France-Presse манбаларга асосланиб хабар бермоқда.

Агентлик маълумотларига кўра, ушбу таклиф АҚШ Президенти Доналд Трамп билан 18 август куни бўлиб ўтган телефон суҳбати пайтида билдирилган. Бу Трамп, Зеленский ва Европа раҳбарларининг Оқ уйдаги учрашуви давомида содир бўлган.

Трамп Зеленский билан музокаралар ўтказиб, Путинга қўнғироқ қилганидан сўнг, уларнинг учрашувига тайёргарлик аллақачон бошланганини маълум қилди.

Франция президенти Эммануэл Макрон учрашув Женевада бўлиши мумкинлигини айтди. Путинни ҳибсга олиш учун ордер берган Халқаро жиноий суднинг аъзоси бўлган Швейцария Путинга сафар вақтида дахлсизлик беришга тайёрлигини расман эълон қилди. Ғарб оммавий ахборот воситалари учрашув ўтказилиши мумкин бўлган бошқа жойлар қаторида Рим ва Будапештни ҳам тилга олишди.

Россия Федерацияси Путиннинг Зеленский билан учрашишга розилигини расман тасдиқламади. Президент ёрдамчиси Юрий Ушаков фақатгина Путин ва Трамп Россия ҳамдаУкраина ўртасидаги икки томонлама музокараларнинг даражасини ошириш ғоясини муҳокама қилганини айтиб ўтди.