Тошкент шаҳрида Кичик ҳалқа автомобиль йўлининг Қатортол кўчасидан Бунёдкор шоҳ кўчасигача бўлган қисмида коммунал хўжалик қувурларини таъмирлаш ишлари бошланди. Бу сабабли 18 августдан бошлаб жами 15 та автобус йўналиши ҳаракатига вақтинча ўзгартиришлар киритилди. Бу ҳақда Транспорт вазирлиги маълум қилди.
Манбаларга кўра, 8, 34, 70, 99, 113, 114, 125, 131, 134, 135 ва 139-сонли йўналишлар ҳаракати Қатортол, Меҳр ва Бунёдкор кўчалари орқали бир томонлама йўналтирилади. Шунингдек, 41, 48, 69 ва 116-сонли йўналишлар ҳаракати ҳам ўзгартирилиб, Қатортол-2 ва Бунёдкор кўчалари орқали йўлга қўйилади.
Вазирлик таъкидлашича, реконструкция ишлари давомида ушбу ҳудудда йўл ҳаракатида тирбандликлар ортиши мумкин. Шунга кўра, эҳтимолан йўловчилар қулайлиги учун қўшимча ўзгартиришлар киритилиши мумкинлиги қайд этилган.
Ҳозирда таъмирлаш ишлари КҲАЙнинг муайян қисмида амалга оширилаётган бўлиб, жараён охирига қадар автобус йўналишлари мазкур тартибда ташкил этилади. Мутасаддилар жамоат транспортидан фойдаланувчи йўловчиларни олдиндан ҳаракат йўналишларини текшириб чиқишга чақирмоқда.
Шу билан бирга, аҳолидан йўлларда эҳтиёткор бўлиш, йўналишлардаги вақтинча ўзгаришларга тез мослашиш сўралмоқда. Таъмирлаш ишлари якунланганидан сўнг автобуслар аввалги тартибда ҳаракатланиши кутилмоқда.