Расмий баёнотда қайд этилишича, мазкур қарор Қирғизистон орқали Россияга йўналтирилган криптовалюта операцияларини тўхтатиш мақсадида қабул қилинган.
Британия ҳукуматига кўра, Москва сўнгги ойларда Қирғизистон молия секторига мурожаат қилиб, пул маблағларини шаффоф бўлмаган йўллар орқали ўтказишга ҳаракат қилган. Бу жараёнда криптовалюта тaрмoқлари, жумладан, Россия рублига боғланган ва Қирғизистонда ишга туширилган A7A5 тизими орқали йирик маблағлар ўтказилган. Маълумотларга кўра, тўрт ой ичида ушбу тизим орқали 9,3 миллиард долларлик транзакциялар амалга оширилган.
Санкциялар доирасида уч нафар жисмоний шахс ва бешта компанияга қарши чекловлар киритилди. Улар орасида Қирғизистоннинг Grinex криптобиржаси, Tengricoin компанияси (Meer Crypto Exchange’ни бошқаради), Old Vector компанияси ва Люксембургда рўйхатдан ўтган Altair Holding бор. Шунингдек, Қирғизистондаги «Марказий Осиё Капитал банки» ҳамда унинг раҳбари Кантемир Чалбаев, Савдо компанияси раҳбари Жанишбек Уулу Назарбек ҳам қора рўйхатка киритилган.
Британия Ташқи ишлар вазири ўринбосари Стивен Даутининг таъкидлашича, Кремл санкциялар таъсирини юмшатиш учун шубҳали криптовалюта тармоқлари орқали маблағларни ювишга уринмоқда, аммо бу ҳаракатлар самарасиз бўлади. Мазкур чекловлар эълон қилингач, Москва ўз навбатида Буюк Британиянинг бир қатор оммавий ахборот воситалари ва нодавлат ташкилотларига қарши жавоб санкциялари киритганини маълум қилди.