Олтин нархининг ўсиши фонида бу қимматбаҳо металлни ноқонуний қазиб олиш ва контрабанда қилиш жиноий гуруҳлар учун ҳар йили ўнлаб миллиард доллар даромад келтирмоқда. Бу ҳақда «Financial Times» газетаси хабар берди.
Нашрга кўра, сўнгги ўн йил ичида олтин нархи уч бараварга, 2025 йил бошидан бери эса 25 фоизга ошган. Бу эса инвесторларни мазкур металлга фаол маблағ киритишга ундамоқда. Бундай шароитда жиноятчилар ноқонуний қазиб олиш ва контрабандани кенгайтириб, катта миқдордаги маблағларни қўлга киритмоқдалар.
SwissAid ташкилотининг ҳисоб-китобларида келтирилишича, фақатгина 2022 йилнинг ўзида Африкадан 31 миллиард долларлик 435 тонна олтин контрабанда йўли билан олиб чиқилган – бу ўн йил аввалгига нисбатан икки баравар кўп.
Перу молиявий назорат органи баҳолашига кўра, 2024 йилда ноқонуний олтин экспортининг улуши мамлакатнинг умумий экспорт ҳажмининг 40 фоизидан ошиб, 15 миллиард долларга етган.
Amazon Underworld платформаси маълумотларида таъкидланишича, Жанубий Америкада жиноий гуруҳлар гиёҳванд моддалардан кўра олтиндан кўпроқ даромад олишмоқда ва олтин конлари учун кураш рақобатдош жиноий уюшмалар ўртасида ўнлаб қотилликлар билан кузатилмоқда.
Кўплаб қуролли можаролар ва заиф давлат тузилмалари мавжуд бўлган Африка мамлакатларида, қазиб олиш ҳамда экспортни назорат қила олмайдиган ҳукуматлар туфайли, турли гуруҳлар ташландиқ конларни эгаллаб олиб, маҳаллий аҳоли ва меҳнат муҳожирларини мажбурий ишлашга жалб қилмоқда. «Financial Times» газетаси экспертларга таяниб хабар беришича, ноқонуний қазиб олинган олтиннинг аксарият қисми қайта ишлангандан сўнг йирик савдо майдончаларига келиб тушади, бу ерда металлнинг келиб чиқиши номаълум бўлиб қолади.
Жумладан, дубайлик заргарлик буюмлари савдогарларидан бири нашрга шундай изоҳ берди: «Биз Суданга бормаймиз, у ердан олтин сотиб олмаймиз ва кейинчалик сотмаймиз ҳам. Биз катта улгуржи бозорга борамиз, пул берамиз ва олтин оламиз, холос».