Доналд Трамп Todd Starnes Show радиодастурида қилган чиқишида Украинадаги ҳарбий можарони тўхтатиш бўйича ҳеч бўлмаганда икки ҳафта ичида аниқлик юзага чиқишини маълум қилди. «Икки ҳафтадан кейин биз ҳаммасига ойдинлик киритамиз», — деди у эфирда.
АҚШ раҳбарининг таъкидлашича, агар Владимир Путин кўрсатилган муддат ичида урушни тўхтатмаса, АҚШ «тактика ўзгартираётганини кўрсатиши»га тўғри келади. Бу эса эҳтимолий сиёсий босим, иқтисодий санкциялар ёки бошқа дипломатик чораларни ўз ичига олиши мумкинлигини англатади.
18 август куни Трамп Украина президенти Володимир Зеленский билан учрашган ва унинг қатъий позициясини мақтаб, «жуда оғир урушда курашаётганини» таъкидлаган. У аввалроқ урушни тўхтатиш учун бир неча бор турли муддатлар белгилаган — аввал 50 кун, кейин 10 кунлик ултиматум эълон қилганди.
29 июл куни Трамп Россия ва унинг савдо ҳамкорларига 100 фоизлик бож жорий этиш билан таҳдид қилган, аммо 15 августда Аляскада Путин билан учрашганидан сўнг бу чоралар орқага сурилган. Вашингтон бунга дипломатик имкониятларни сақлаб қолиш зарурати билан изоҳ берди.
18 августда Трамп Европа етакчилари ва Зеленский билан учрашувда «музокаралар бир-икки ҳафтада натижа бериши мумкин», деб баҳо берган. Унинг фикрича, урушни тугатиш бўйича «жуда мураккаб масалалар» йўқ ва келишув имзоланиши учун сиёсий ирода етарли.
21 август куни The Guardian Трамп Путин ва Зеленский ўртасидаги тўғридан тўғри учрашувни ташкил этиш уринишларини вақтинча тўхтатганини хабар қилди. АҚШ раҳбарига кўра, бу ташаббус Киев ва Москва томонидан бошланиши керак.