The Wall Street Journal нашрининг ёзишича, Аляскадаги учрашувдан бир ҳафта ва Оқ уйдаги саммитдан тўрт кун ўтибоқ, Трампнинг тинчлик ташаббуслари яна тўсиққа учради. Нашрнинг таъкидига кўра, АҚШ президентидаги умидлар сўнмоқда.
21 август куни Truth Social тармоғида Трамп Украина Россия ҳудудига зарба бера олмас экан, урушда ғалаба қозона олмаслигини қайд этди. «Фантастик ҳимояси бор жамоага ҳужум қилиш тақиқланган бўлса, ғалаба имконсиз», — деб ёзди у ва жавоб зарбасига рухсат бермаган Жо Байденни танқид қилди.
WSJ’нинг таъкидлашича, Трамп бу ҳафта ҳам ўзининг етти ойлик президентлиги давомида кўтарилган асосий муаммога юз тутаётир: у Путинга босим ўтказиш ва Украина президенти Володимир Зеленскийни қўллаб-қувватлашда қанчалик узоққа боришга тайёр?
Нашрга кўра, Трамп Зеленский ва Путинни учраштириш орқали урушни тўхтатишга умид қилган эди — лекин бу режа ҳам амалга ошмайдиганга ўхшаяпти. АҚШ ва Европа дипломатлари ҳозирда Киевга хавфсизлик кафолатлари бўйича музокараларни давом эттирмоқда. Шу жумладан, Украинага халқаро тинчликпарвар кучларини жойлаштириш формати муҳокама қилинмоқда.
Бироқ Кремл Украина ҳудудида хорижий ҳарбийлар бўлишини қабул қилмаслигини аниқ баён этган. Бу эса яқин вақт ичида тинчлик режаси бўйича келишув эҳтимолини янада қийинлаштиради.