The Economist журналининг ёзишича, Европа Иттифоқи мамлакатлари Доналд Трампнинг Нобел тинчлик мукофотини олиш истагидан дипломатик босим сифатида фойдаланишни режалаштирмоқда. Мақолада айтилишича, Европа етакчилари Нобел қўмитасига номзод сифатида Трампни кўрсатишни очиқ қўллаб-қувватлаб, уни Россия ва Украина ўртасидаги можарони ҳал қилиш музокараларига фаолроқ жалб этишга интилишлари мумкин.
Мукофотга кимни кўрсатиш ҳуқуқига дунё бўйича юз минглаб олим ва жамоат арбоблари эга. Шунга қарамай, Европа томонидан бериладиган рамзий қўллаб-қувватлаш АҚШ президенти учун муҳим бўлиши мумкин.
Журнал таъкидлашича, Норвегияда жойлашган беш кишилик Нобел қўмитаси сўнгги қарорни мустақил қабул қилади. Лекин Брюссел ва Осло Трампни камида расман номзод қилиб кўрсатиш орқали унинг тинчлик ташаббусларини рағбатлантириши мумкин.
NBC телеканали 15 август куни хабар беришича, Доналд Трамп мукофотни олишни жуда истайди, ҳатто бу масалада Норвегиянинг собиқ Бош вазири ва НАТОнинг собиқ Бош котиби Йенс Столтенбергга қўнғироқ қилган. Расман бу мулоқот тарифлар ҳақида бўлгани айтилган, бироқ The Guardian нашрига кўра, Трамп Норвегияга савдо имтиёзлари эвазига мукофотни осонлаштиришни таклиф қилган бўлиши мумкин.
Трамп аввалроқ ўзига тегишли Truth Social ижтимоий тармоғида шундай деб ёзган эди: «Мен нимаики қилмай, барибир Нобел мукофотини олмайман. Лекин одамлар ҳақиқатни билади. Шуниси — энг муҳими».
The Economist таҳлилига кўра, Европа Трампнинг эҳтирослари орқали уни тинчлик йўлидаги ҳаракатларга ундашга ҳаракат қилмоқда. Аммо музокаралар натижаси, аввало, Москва ва Киевга боғлиқ бўлиб қолаверади.