«Украинанинг миллий байрами — Мустақиллик куни муносабати билан Сизни ва бутун Украина халқини самимий муборакбод этаман.
Ишончим комилки, давлатларимиз ўртасидаги анъанавий дўстлик ва узоқ муддатли ҳамкорлик тамойилларига асосланган алоқалар келгусида ҳам халқлармиз умумий манфаатлари йўлида ривожланиб бораверади.
Фурсатдан фойдаланиб, Сизга мустаҳкам соғлиқ, оилавий бахт-саодат, масъулиятли фаолиятингизда муваффақиятлар, украина халқига эсатинчлик-омонлик ва фаровонлик тилаб қоламан», — дейилади Президент Мирзиёев табригида.
Украина президенти Володимир Зеленский ижтимоий тармоқларда Мирзиёевнинг хатини эълон қилди ва табрик учун ташаккурнома билдирди.
«Президент Мирзиёев, Украина Мустақиллиги куни муносабати билан билдирган илиқ тилакларингиз учун чин қалбимдан минатдорман.
Давлатларимиз Украина ва Ўзбекистон халқларининг манфаатлари йўлида ҳамкорликни ривожлантириши ва икки томонлама муносабатларни ривожлантиришда давом этишига ишончим комил.
Сизнинг Украинанинг ҳудудий яхлитлиги ва украиналик болаларнинг Ўзбекистонда ҳордиқ чиқариши бўйича кўрсатган инсонпарварлик ташаббусларингизни қадрлайман», — деб ёзди Зеленский X ижтимоий тармоғида.
Шунингдек, Ўзбекистоннинг Киевдаги элчихонаси Украина халқини Мустақиллик куни билан табриклаб, ушбу сана озодлик, суверенитет ва бирдамликка интилиш рамзи эканини таъкидлади. Дипломатик ваколатхона табрик матнини ўзининг Facebook саҳифасида эълон қилди.
«Ушбу муҳим кун Украинанинг озодлик, суверенитет ва бирдамликка интилишини англатади, Украина халқининг руҳий қуввати, матонати ва тинчлик, барқарорлик ҳамда фаровонликка бўлган тинимсиз интилишини акс эттиради», — дейилади хабарда.
Украина Мустақиллик куни муносабати билан қўшни давлатлар раҳбарлари ҳам табрик йўлламоқда. Хусусан, Қозоғистон президенти Қосим-Жўмарт Тўқаев Украина президенти Володимир Зеленскийга табрик телеграммаси йўллади. Озарбойжон президенти Илҳом Алиев ҳам Зеленскийни табриклаб, мамлакатлар ўзаро қўллаб-қувватлаш ва бирдамликни давом эттираётганини таъкидлади. Унинг сўзларига кўра, Озарбойжон дўст Украина халқини зарур инсонпарварлик ёрдами билан қўллаб-қувватлайди.