«Uzbekistan Airports» компанияси бодикамераларни етказиб бериш, ўрнатиш ва ишга тушириш бўйича тендер жараёнлари юзасидан расмий баёнот эълон қилди. Компания маълумотларига кўра, харид амалдаги қонунчилик ва давлат харидлари тартибларига тўлиқ риоя қилинган ҳолда амалга оширилган.
Шартнома якуний қиймати 4,3 млрд сўмни (ҚҚС билан) ташкил этган. Ижтимоий тармоқларда қайд этилган 6,8 млрд сўм эса тижорат таклифларининг ўртача баҳоси бўлиб, бошланғич нарх сифатида кўрсатилган. Таклифлар «uzairports.com» расмий сайти орқали қабул қилинган.
Компания таъкидлашича, тендер жараёнида иштирокчиларнинг ўзаро боғлиқлиги ҳақида маълумот йўқ. Кейинчалик аниқланган ҳолатлар эса натижалар тасдиқлангандан сўнг маълум бўлган. Шу сабабли Коррупсияга қарши кураш агентлиги тақдимномаси асосида харид натижалари ҳақиқий эмас деб топилиб, бекор қилинган.
ОАВда тилга олинган учинчи компания танловда қатнашмаган, балки фақатгина захира ғолиб билан бир хил манзилдан рўйхатдан ўтган. Бироқ қонунчиликка кўра, бир неча компаниянинг бир жойда рўйхатдан ўтиши тақиқланмаган. Шунинг учун ғолибни ёки захира ғолибни четлатишга асос бўлмаган.
Компания тендер жараёни «etender.uzex.uz» очиқ электрон платформасида ўтганини ва унда резидент ҳамда норезидент тадбиркорлар тенг ҳуқуқда иштирок этиш имкониятига эга бўлганини қайд этди. Хужжатлар 10–17 июл кунлари қабул қилинган, танлов эса энг паст нарх таклифига кўра ўтказилган.