Эрон олий раҳнамоси Оятуллоҳ Али Хоманаийнинг таъкидлашича, АҚШнинг босим ва талаблари оғир ҳақорат ҳисобланади ва эрон халқи унга бутун кучи билан қаршилик қилади. Бу ҳақда Al Jazeera хабар берди.
Хоманаий 24 август куни Теҳрондаги диний маросимда сўзлаган нутқида: « АҚШ Эронни ўз таъсирига бўйсундиришни хоҳламоқда, аммо халқ буни қабул қилмайди. Шу билан бирга, у АҚШ билан тўғридан-тўғри музокара олиб боришни таклиф қилаётганларни вазиятга юзаки ёндашишда айблади ва бу муаммо бундай йўл билан ҳал этилмайди» — деди.
Хоманаий бу баёнотини Эрон ва Европа давлатлари 22 август куни ядро дастури бўйича музокараларни қайта тиклашга келишганидан кейин айтган. Агар Теҳрон музокараларга қайтмаса, Франция, Германия ва Буюк Британия БМТ санкцияларини қайта жорий этишга тайёрлигини эълон қилган.
Маълумот учун, июн ойида Эрон ва Исроил ўртасидаги 12 кунлик урушда мамлакат ядро объектларига зарбалар берилгандан сўнг Теҳрон Вашингтон билан ядро музокараларини тўхтатган эди. Хоманаий душманнинг асосий мақсади мамлакат ичида ихтилоф келтириб чиқариш эканини таъкидлаб, бунда «америкалик агентлар ва сионистик режим»ни айблаган.
Ғарб давлатлари эса Эронни ядровий қурол ишлаб чиқишда айблаб келмоқда. Бироқ Теҳрон бу дастур фақат тинчлик мақсадларига хизмат қилаётганини таъкидлайди. 2015 йилда АҚШ ва Европа давлатлари билан имзоланган ядровий келишувга кўра, Эрон ўз дастурини чеклаш эвазига халқаро санкциялардан озод қилиниши лозим эди. Бироқ Доналд Трамп 2018 йилда келишувдан чиқиб, Теҳронга янги санкциялар жорий этган.