Ўзбекистон Республикаси президенти Шавкат Мирзиёевнинг таклифига биноан Иордания Ҳошимийлар Подшоҳлиги подшоҳи Абдулла II ибн ал-Ҳусайн 25 август куни давлат ташрифи билан Ўзбекистонга келди. Бу ҳақда президент матбуот хизмати хабар бермоқда.
Унга кўра, Самарқанд шаҳри аэропортида Иордания подшоҳини Ўзбекистон президенти Шавкат Мирзиёев кутиб олган.
Олий мартабали меҳмон шарафига икки мамлакат давлат байроқлари кўтарилган, фахрий қоровул саф тортган. Миллий куй-қўшиқ ва рақслардан иборат тантанали маросим бўлиб ўтган.
Ташрифнинг асосий тадбирлари эртага режалаштирилган. Бугун давлат раҳбарлари биргаликда қадимий Самарқанднинг тарихий обидаларини зиёрат қиладилар.
