«Дунё» ахборот агентлигининг ёзишича, Ўзбекистоннинг Швециядаги элчихонаси ва Centrum Air авиакомпанияси мазкур йўналишни йўлга қўйиш масаласини муҳокама қилди. Унга кўра, рейслар ҳафтанинг сешанба ва пайшанба кунлари бажарилади. Илк парвоз 2 октябрга белгиланган.
Centrum Air маълумотларига кўра, чипталар нархи бир томонга 3,5 млн сўмдан, икки томонга эса 6,9 млн сўмдан бошланади. Йўналиш асосан транзит йўловчиларга мўлжалланган бўлиб, Дания, Швеция, Норвегия, Финляндия ва Исландия йўловчилари учун компаниянинг Бангкок қатновига уланиш имконини яратади.
Авиакомпания вакилларининг таъкидлашича, Копенҳагендан тўғридан-тўғри Бангкок, Сеул ёки Малдив оролларига парвоз қилиш икки баробар қимматга тушади. Тошкент орқали эса йўловчилар учун 50 фоизгача арзон бўлиши кутилмоқда.
Шунингдек, музокараларда Ўзбекистон ва Скандинавия мамлакатлари ўртасида савдо алоқаларини кенгайтириш, туризм ва маданий тадбирларни йўлга қўйиш, йирик халқаро сайёҳлик кўргазмаларида тақдимотлар ўтказиш ҳам муҳокама қилинди. Скандинавиялик блогер ва журналистлар учун Ўзбекистонга пресс-тур ташкил этиш ташаббуси ҳам қўллаб-қувватланди.