Bloomberg хабар беришича, даъво Техаснинг Шимолий округи судига тақдим этилган. Масалан, ChatGPT’нинг iOS тизимига интеграция қилиниши орқали фойдаланувчилар танлов эркинлигидан маҳрум бўлгани қайд этилмоқда. Маскнинг фикрича, бу ҳолат смартфон ва генератив сунъий интеллект бозорида монополияни мустаҳкамлашга хизмат қилмоқда.
Даъвогарлар, шунингдек, App Store’даги рейтинг тизими орқали OpenAI рақобатчилари сунъий равишда четга сурилаётганини таъкидламоқда. Маск аввал ҳам Apple’ни монополияга қарши қонунларни бузишда айблаб келган ва xAI орқали бу борада расмий даъво тайёрлаётганини маълум қилганди.
Унинг айтишича, App Store OpenAI’дан ташқари бошқа сунъий интеллект компаниялари иловаларини юқори ўринларга чиқармаяпти. Шунингдек, X ва Grok чат-боти каби дастурлар «зарур» иловалар рўйхатига киритилмаган, рақобатчилар эса имтиёзли шартларда илгари сурилаётган.
OpenAI раҳбари Сем Алтман эса Маскни X платформасини шахсий манфаатлари йўлида ишлатишда айблади. Унинг таъкидлашича, OpenAI жамоаси асосий эътиборини «ажойиб маҳсулотлар яратиш»га қаратмоқчи.
Айни пайтда Grok АҚШ App Store’ида «Энг яхши бепул иловалар» рўйхатининг олтинчи ўрнида турса, ChatGPT биринчи ўринни эгаллаб турибди. Apple ва OpenAI ҳамкорлиги доирасида GPT-5 модели Apple Intelligence’га интеграция қилингани маълум қилинган.
Маск ва OpenAI ўртасидаги келишмовчиликлар 2018 йилдан бери давом этиб келмоқда. У аввал компания директорлар кенгашидан кетган, 2024 йилда эса яна судга мурожаат қилиб, OpenAI’ни Microsoft’нинг ёпиқ «шўба корхонаси»га айлантиришда айблаган эди.