Ташкил этилганига уч ҳафта бўлган хитойликларга тегишли корхона олтин кони бўйича аукционда ютиб чиқди. Бу ҳақда Pinkod.uz нашри хабар берди.
Қайд этилишича, 26 август куни E-auksion платформасида Навоий вилоятининг «Ойдинбулоқ» участкасида геологик изланишлар олиб бориш ҳуқуқи савдога қўйилган.
Бошланғич нархи 4,12 млрд сўм этиб белгиланган лот учун савдо 2 соат 28 дақиқа давом этган ва якунда «Zhongcheng Mining» компанияси 13,1 млрд сўмлик таклиф билан ғолиб чиққан.
«Ойдинбулоқ» участкаси Нурота тумани, Дебаланд шаҳарчасидан 20,5 км жануби-ғарбда жойлашган бўлиб, майдони 40 гектарни ташкил этади. Геологик ҳисоб-китобларга кўра, бу ҳудудда 1,3 тонна олтин ва 7,1 тонна кумуш захираси мавжудлиги тахмин қилинмоқда.
Эътиборлиси, компания атиги уч ҳафта аввал, 2025 йил 8 август куни рўйхатдан ўтган. Унинг таъсисчиси сифатида Ши Чунхуан (Shi Chonghuan) кўрсатилган.
Шунингдек, рўйхатдан ўтганидан бор-йўғи саккиз кун ўтиб, яъни 14 август куни, «Zhongcheng Mining» Бухоро вилоятининг Ғиждувон туманидан 15 км узоқликдаги «Четтик» участкаси бўйича аукционда ҳам ғолиб чиққан.
Компания 35,6 млрд сўмлик таклиф киритиб лотни ютиб олган. Бу бошланғич нарх (4,1 млрд сўм)дан 8,6 баробар кўп. Участканинг майдони 1314 гектарни ташкил қилиб, ундаги эҳтимолий олтин захиралари 4,57 тонна деб баҳоланмоқда.
«Шундай қилиб, янги ташкил этилган корхона қисқа вақт ичида кетма-кет икки йирик олтин конидан фойдаланиш ҳуқуқини қўлга киритди», — дейилади Pinkod.uz хабарида.