27 август куни Аргентина президенти Хавиер Милей кортежи сайловолди тадбири пайтида норозилар томонидан ҳужумга учради. Тош ва тухумлар отилган автомобилда унинг синглиси ҳам бор эди. Улар хавфсизлик хизмати томонидан шошилинч эвакуация қилинган. Бу ҳақда «Reuters» нашри хабар берди.
Қайд этилишича, ҳодиса оқибатида бир нечта одам жароҳат олган. Президент ўз резиденциясига етиб боргач, ижтимоий тармоқда бу воқеада собиқ президент Кристина Фернандес де Киршнер тарафдорларини айблаган.
Аммо воқеа марказида унинг синглиси Карина Милей бўлиб қолмоқда. У давлат маблағларини ноқонуний ўзлаштиришда гумон қилинмоқда. Матбуотга тарқалган аудиоёзувда миллий агентлик раҳбари Диего Спанюоло уни коррупцияда айблаган. Карина Милей фармацевтик компаниялардан пора олгани айтилмоқда. Президент бу айбловларни рад этиб, «бу туҳмат» деб баёнот берди.
Мазкур можаро Милей ва унинг партияси учун катта синовга айланди. 26 октябрда парламент сайловлари бўлиб ўтади. Ҳозирча президентнинг либертариан партияси қонун чиқарувчи органларда кўпчилик ўринга эга эмас. Шунга қаратилган сиёсий кураш ортидан у ўз нуфузини сақлаб қолишга ҳаракат қилмоқда.
Сайловолди жараёнда Милейнинг қийинчиликлари фақат коррупция можароси билан чегараланмайди. Унинг қаттиқ иқтисодий чоралари инфляцияни камайтирса-да, аҳоли орасида норозилик кучайган. Яқинда ўтказилган сўровларга кўра, президентнинг рейтинги 44 фоиз атрофида бўлиб турибди.