Бугун, 28 август куни Ўзбекистон президенти Шавкат Мирзиёев мамлакатда амалий ташриф билан бўлиб турган Америка Қўшма Штатлари президентининг глобал шерикликлар бўйича махсус вакили Паоло Замполлини қабул қилди. Бу ҳақда Ўзбекистон президенти матбуот хизмати хабар берди.
Қайд этилишича, АҚШ маъмуриятининг юқори мартабали вакили Шавкат Мирзиёевга Доналд Трампнинг самимий саломи ва Ўзбекистон мустақиллиги куни муносабати билан табрикларини етказган.
Учрашувда Ўзбекистон билан АҚШ ўртасидаги стратегик шериклик ва кўп қиррали ҳамкорлик муносабатларини янада кенгайтириш масалалари атрофлича кўриб чиқилган.
«Турли даражаларда самарали алоқалар давом этаётгани алоҳида мамнуният билан қайд этилди. Конструктив сиёсий мулоқот ривожланмоқда, фаол парламентлараро алмашинувлар амалга оширилмоқда. Ўтган ойда Конгрессда Ўзбекистон куни доирасидаги тадбирлар ўтказилди, бу йил кузда Кенгайтирилган стратегик шериклик мулоқотининг биринчи йиғилиши бўлиб ўтади. Хавфсизлик соҳасида, терроризм, экстремизм ва ноқонуний миграцияга қарши курашиш борасида самарали ҳамкорлик йўлга қўйилган», — дейилади хабарда.
Маълумот учун, АҚШ анъанавий равишда Ўзбекистоннинг муҳим иқтисодий ҳамкори ҳисобланади. 2024 йилда товар айирбошлаш ҳажми 15 фоизга кўпайган. Лойиҳалар портфели 11 миллиард доллардан ошган. Жорий йил июн ойида ўтказилган Тошкент инвестиция форумида АҚШнинг 100 дан ортиқ етакчи компаниялари иштирок этди.
Учрашувда минерал ресурслар, авиация, электротехника, қишлоқ хўжалиги, рақамли технологиялар, молия, инновациялар, таълим ва бошқа устувор йўналишларда кооперация лойиҳаларини илгари суриш учун катта салоҳият мавжудлиги қайд этилди.
«С5+1» формати доирасида минтақавий ҳамкорликни ривожлантириш муҳим экани таъкидланган. Бўлажак мулоқотлар ва қўшма тадбирлар режаси ҳам кўриб чиқилган.