Ўзбекистонда дори воситалари ва тиббий техника воситаларини рўйхатдан ўтказиш тартиби янгиланади. Бу ҳақда Адлия вазирлиги хабар берди.
Янги талабларга кўра, тиббий буюмлар давлат рўйхатидан ўтказилади ва инсон ҳаётига боғлиқ хавф даражасига кўра тўрт тоифага ажратилади. Бундан ташқари, уларни рўйхатга олиш фақат клиник тадқиқотлар ижобий натижа берганда амалга оширилади.
Дори воситалари учун 2027 йил 1 январдан миллий «GMP» сертификати талаб этилади. Тиббий буюмлар эса 2027 йил 1 июлдан ISO:13485 миллий стандартига мувофиқлик сертификатисиз рўйхатдан ўтказилмайди.
Шунингдек, 2026 йилдан барча маҳаллий ва хорижий ишлаб чиқарувчилар дори воситаларини рўйхатдан ўтказиш ёки рўйхат муддатини узайтириш учун мажбурий равишда миллий GMP сертификатини тақдим этиши шарт. Уларга берилган рўйхат гувоҳномалари беш йиллик муддатга эга бўлади. Илгари маҳаллий ишлаб чиқарувчиларга берилган доимий гувоҳномалар ҳам энди беш йиллик ҳисобланади.
Дори воситалари ва тиббий буюмларни ишлаб чиқариш фақат лицензияга эга корхоналар томонидан, ҳуқуқ эгаси буюртмасига кўра амалга оширилади. Шу билан бирга, тиббий буюмларни чакана сотиш учун лицензия талаб этилмайди, фақатгина ваколатли органни хабардор қилишнинг ўзи кифоя қилади.