Украинанинг сўнгги дрон ҳужумлари туфайли Россияда 10 та нефтни қайта ишлаш заводи ишдан чиқди. Америкадаги урушни ўрганиш институти (ISW) таҳлилчиларига кўра, бу мамлакатда бензин танқислигини келтириб чиқариб, АИ-95 каби премиум маркали ёнилғилар етишмовчилигига олиб келди. Бу ҳолат айрим ҳудудларда нархларни кескин оширди.
Бу орада Россияда 1 мартдан буён амал қилиб келаётган, август ойи охирида тугаши лозим бўлган бензин экспортига тақиқ яна икки ойга чўзилгани эълон қилинди.
Reuters агентлигига кўра, Россия сўнгги зарбалардан сўнг нефт қайта ишлаш қувватининг камида 17 фоизини йўқотган — бу тахминан кунига 1,1 млн баррел дегани. Шу боис, мамлакат хомашёни қайта ишлаш ўрнига экспортга кўпроқ эътибор қаратмоқда.
Wall Street Journal хабарига кўра, Қрим ва Курил ороллари каби ҳудудларда АИ-92 бензини сотуви чекланган. ISWʼнинг таъкидлашича, бу нафақат истеъмол ва ишлаб чиқариш харажатларини, балки инфляция даражасини ҳам ошириши мумкин.
Шу билан бирга, АҚШнинг Ҳиндистонга қарши жорий этган янги тарифлари орқали Россия нефтини сотиш имконияти қисқариши мумкин. Bloomberg маълумотига кўра, Ҳиндистон нефт қайта ишлаш заводлари россиялик таъминотчилардан харидларни камайтиради.
ISW хулосасида ёзилишича, ички танқислик, инфляция ва ташқи бозордаги чекловлар Россиянинг ҳарбий харажатларини молиялаштиришини жиддий заифлаштириши мумкин. Бу эса мамлакатдаги макроиқтисодий барқарорликка таҳдид солади.