БМТ Хавфсизлик кенгашининг Ню Йоркдаги сессиясида Ғазода очарчилик авж олгани кескин муҳокама қилинди. Франция ва Буюк Британия каби Исроилнинг ғарблик иттифоқчилари ҳам қўшилиб, 14 давлат «очарчилик сунъий равишда яратилган инқироз» эканини таъкидлади. Фақат АҚШ бу баёнотга қарши чиқди.
Ҳужжатда «Ғазодаги очарчиликни тўхтатиш дарҳол амалга оширилиши лозим. Вақт ўтиб бормоқда. Исроил ўз сиёсатини қайта кўриб чиқиши шарт», дея таъкидланди. Кенгаш аъзолари Исроилдан барча чекловларни бекор қилиш, ёрдам етказилишини кафолатлаш, барча гаровдагиларни озод қилиш ва доимий ўт очишни тўхтатишни талаб қилди.
Халқаро озиқ-овқат хавфсизлиги тизими — IPC маълумотларига кўра, Ғазода расман очарчилик қайд этилган. 514 минг аҳоли (тахминан ҳар тўртинчи киши) ўта оғир қийинчиликка учраган, сентябр охиригача бу кўрсаткич 641 мингга етиши мумкин.
Исроил бу хулосаларни «ёлғон ва нохолис» дея рад этди, мутахассислар ХАМАС томонидан берилган маълумотларга асосланаётганини писанда қилди. АҚШнинг БМТдаги вақтинчалик вакили Дороти Ши ҳам ҳисобот ишонарли эмаслигини айтди, аммо шундай деди: «Ҳаммамиз Ғазода очарчилик чинакам бўй кўрсатаётган муаммо эканини тушунамиз ва ҳуманитар эҳтиёдлар бор. Бу эҳтиёжларни қаноатлантириш АҚШ учун устувор масала».
Шунга қарамай, Вашингтон Исроил ўз олдидаги муаммоларни ҳал қилаётгани ва етарли миқдорда инсонпарварлик ёрдамлари етказаётганини таъкидлаб, БМТда Исроилга ён босувчи ягона давлат бўлиб қолмоқда. Шу билан бирга, АҚШ президенти Доналд Трамп 27 август куни бўлиб ўтган учрашувда Ғазодаги очарчиликка эътибор қаратди ва Исроилни муаммони ҳал этишни «тезлаштиришга» чақирди.