Бугун, 29 август куни Олий таълим, фан ва инновациялар вазирлиги бешта университетга бир нечта қўшимча йўналишлар бўйича берилган лицензияларни техник хатолик, деб эълон қилган эди. Лекин, Адлия вазирлиги тегишли тизимда носозлик бўлганини рад этди.
«Лицензия» ахборот тизими (license.gov.uz)да техник носозликлар ҳамда рухсат этилмаган ҳаракатлар кузатилмаган ва тизим штат режимида ишлаб турибди», – дейилади Адлия вазирлиги баёнотида.
Бироқ, Олий таълим вазирлигига кўра, 29 август куни соат 06:19 дан 09:53 гача license.gov.uz ахборот тизимида юзага келган техник носозлик сабабли, кўриб чиқиш муддати тугамаган аризалар бўйича айрим нодавлат олий таълим ташкилотларининг амалдаги лицензияларига ўзгартириш киритиш ҳақидаги сўровларига тизим томонидан белгиланган талаб бузилган ҳолда ижобий хулосалар шакллантирилган.
Олий таълим вазирлиги қуйидаги таълим ташкилотларига янги таълим йўналишлари, мутахассисликлари, таълим шакллари ва фаолият манзиллари бўйича қабул жараёнларини ташкил этиш учун 29 август куни ҳеч қандай рухсат берилмаганини айтмоқда:
— «University of Business and Scienc» МЧЖ – масофавий таълим шаклларига;
— «Осиё халқаро университети» МЧЖ – айрим масофавий таълим шаклларига ҳамда Хоразм вилояти, Урганч шаҳридаги янги фаолият манзилига;
— «Иқтисодиёт ва педагогика университети» НТМ – тиббиёт йўналишлари ва магистратура мутахассисликлари, масофавий таълим шакллари ҳамда Сурхондарё вилояти, Денов туманидаги янги фаолият манзилига;
— «Sharq-University» МЧЖ – банк иши, бухгалтерия ҳисоби таълим йўналишлари ва барча кечки ва масофавий шаклларга;
— «Profi University» МЧЖ – юриспруденция таълим йўналиши, масофавий шакл ва барча магистратура мутахассисликларига.
«Шу сабабли, мазкур ташкилотлар томонидан юқоридаги йўналишлар, мутахассисликлар, таълим шакллари ҳамда фаолият манзиллари бўйича эълон қилинаётган маълумотлар асоссиз ҳисобланади», – дейилади вазирлик баёнотида.
Адлия вазирлигига ишониладиган бўлса, саналган университетларнинг бугун эрталаб олган лицензиялари (қўшимча йўналишлар билан) тўлиқ юридик асосга эга ва уларни лицензия базасидан топиш мумкин.
Қайд этиш керак, бу Олий таълим, фан ва инновациялар вазирлиги томонидан нодавлат ОТМга техник хатолик оқибатида лицензия берилгани айтилган илк ҳолат эмас. 2024 йилнинг 21 август куни «Абу Райҳон Беруний университети» НТМга лицензия берган вазирлик бир ой ўтгач бу лицензия «тизимда юзага келган техник носозлик сабаб хато берилган»ини маълум қилганди. Вазирлик уни бекор қилиш ҳақида судга ариза ҳам киритган эди.
«Тасаввур қилинг, масалан Марказий банк ХХХ, УУУ, ZZZ банкларига лицензия берса-да, сайтига ёки лицензион порталга уларнинг лицензияси жойлангач, бу техник хатолик бўлган экан деб турса. Ким ишонади? Ишондиям дейлик, бундан кейин репутация нима бўлади? Дискредитация бўлган органнинг аввалги ва кейинги қарорлари ҳам шубҳа остида қоладими?», — дея ёзмоқда иқтисодчи Отабек Бакиров.
Маълумот учун, «Лицензиялаш, рухсат бериш ва хабардор қилиш тартиб-таомиллари тўғрисида»га қонуннинг 14-моддасига биноан, лицензиялаш соҳасидаги ваколатли органлар ушбу ваколатли органлар томонидан лицензияланадиган фаолиятни амалга оширадиган корхоналар, муассасалар ва ташкилотларни ташкил этишга ёки уларнинг фаолиятида муассислар, акциядорлар ёхуд иштирокчилар сифатида иштирок этишга ҳақли эмас, бундан қонунда назарда тутилган ҳоллар мустасно.