Ўзбекистон Фаластин халқи Бирлашган Миллатлар Ташкилоти резолюциялари билан тасдиқланган ҳуқуққа, яъни ўзининг мустақил давлатини барпо этиш ҳуқуқига эга, деган қатъий позицияда. Бу ҳақда президент Шавкат Мирзиёев «Янги Ўзбекистон» боғида бўлиб ўтаётган давлат мустақиллигининг 34 йиллигига бағишланган байрам тадбирида сўз очди.
«Афғонистон минтақавий ва глобал хавфсизликнинг муҳим омили эканидан келиб чиқиб, ушбу мамлакатнинг ҳукумати билан конструктив ва амалий ҳамкорлик олиб бориш зарур, деб биламиз. Биз Фаластин халқи Бирлашган Миллатлар Ташкилоти резолюциялари билан тасдиқланган ҳуқуққа, яъни ўзининг мустақил давлатини барпо этиш ҳуқуқига эга, деган қатъий позициямизни яна бир бор билдирамиз»,
– деди президент.
Мирзиёевга кўра, ўзбек халқи уруш ва офатлар вақтида оғир вазиятга тушиб қолган бегуноҳ инсонларга доимо беғараз ёрдам кўрсатиб келган.
Давлат раҳбари инсонпарварлик анъаналарига содиқ қолиб, Ўзбекистонга олиб келинган Фаластин фуқароларига меҳмонлар сифатида зарур ижтимоий, моддий ва маънавий ёрдам кўрсатиш бўйича махсус фармон қабул қилинганини қўшимча қилди.
Шунингдек, президент бағрикенг, меҳр-оқибатли ўзбек халқи ушбу фармонда кўзда тутилган чора-тадбирларни ҳар томонлама қўллаб-қувватлаб, уларни амалга оширишда фаол иштирок этишига ишонч билдирди.