Арманистон бош вазири Никол Пашинян мамлакат Евроосиё иқтисодий иттифоқи (ЕОИИ)дан чиқиши мумкинлигини айтди. Унга кўра, Арманистон Европага интеграцияни мақсад қилган ва шу сабаб, бир вақтда ЕОИИ ва Европа Иттифоқи (ЕИ)да аъзо бўлиб туриш мумкин эмас. «Сўнгги қарор фурсати етганди, биз кераклисини қабул қиламиз», — деди у.
Жорий йил 4 апрел куни Арманистон президенти Ваагн Хачатурян мамлакатнинг ЕИга қўшилиш нияти тўғрисидаги қонунни имзолаган эди. Бу қонун парламент томонидан маъқулланган ва евроинтеграция масаласи бўйича референдум ўтказилиши кутилмоқда. Европа Иттифоқи ҳозирча тўлиқ аъзолик таклиф этмаган, бироқ июн ойида ЕИ ташқи ишлар ва хавфсизлик сиёсати раҳбари Кая Каллас Ереван билан барча соҳалар бўйича ҳамкорликни чуқурлаштиришга тайёрлигини билдирган.
Россия ташқи ишлар вазири Сергей Лавров Арманистоннинг ЕИ аъзолиги ва ЕОИИда қолиши ўртасида зиддият борлигини таъкидлаган. Унга кўра, бу икки ташкилотда турли тариф сиёсатлари ва эркин савдо зоналари мавжуд. Россия президенти матбуот котиби Дмитрий Песков ҳам буни «турлича тижорат ва иқтисодий макон», деб атаган.
Бундан ташқари, Лавровнинг ўринбосари Михаил Галузин ЕИни «аксилрус қоидаларга бўйсунадиган тузилма» деб баҳолаб, Арманистонни ЕОИИдан чиқишдан ҳазир бўлишга чақирган. Шунга қарамай, Кремл Арманистоннинг евроинтеграция ҳаракатини «суверен қарор» деб атаган, лекин бир вақтда икки ташкилотда аъзолик мумкин эмаслигини яна бир бор таъкидлаган.
Европа Иттифоқи ва Арманистон 2024 йилда янги ҳамкорлик кун тартибини муҳокама қилишни бошлаган. Сентябрда эса икки томон визасиз сафарлар бўйича музокаралар бошлаган. Брюссел Еревандан чегара назорати, миграция ва коррупцияга қарши кураш бўйича ислоҳотлар талаб қилмоқда.