Олий таълим, фан ва инновациялар вазирлиги хабарига кўра, 2025 йил 29 август куни соат 06:19 дан 09:53 гача license.gov.uz ахборот тизимида техник носозлик юзага келган. Оқибатда кўриб чиқиш муддати тугамаган аризалар бўйича айрим нодавлат олий таълим ташкилотларининг амалдаги лицензияларига ўзгартириш киритиш ҳақидаги сўровларига тизим томонидан белгиланган талаб бузилган ҳолда рухсат берилган.
Вазирлик таъкидлашича, мазкур ҳолат техник хатолик ҳисобланиб, ҳозирда унинг сабаблари тегишли идоралар билан ҳамкорликда чуқур ўрганилмоқда.
Шу билан бирга, вазирлик қуйидаги таълим ташкилотларига янги таълим йўналишлари, мутахассисликлари, таълим шакллари ҳамда фаолият манзиллари бўйича қабул жараёнларини ташкил этиш учун ҳеч қандай рухсат берилмаганини айтган:
«UNIVERSITY OF BUSINESS AND SCIENCE» МЧЖ – масофавий таълим шаклларига;
«Osiyo Xalqaro Universiteti» МЧЖ – масофавий таълим шаклларига ҳамда Хоразм вилояти, Урганч шаҳридаги янги фаолият манзилига;
«Iqtisodiyot va Pedagogika Universiteti» НТМ –тиббиёт йўналишлари ва магистратура мутахассисликлари, масофавий таълим шакллари ҳамда Сурхондарё вилояти, Денов туманидаги янги фаолият манзилига;
«SHARQ-UNIVERSITY» МЧЖ – банк иши, бухгалтерия ҳисоби таълим йўналишлари ва барча кечки ва масофавий шаклларга;
«PROFI UNIVERSITY» МЧЖ – юриспруденция таълим йўналиши, масофавий шакл ва барча магистратура мутахассисликларига.
«Шу сабабли, мазкур ташкилотлар томонидан юқоридаги йўналишлар, мутахассисликлар, таълим шакллари ҳамда фаолият манзиллари бўйича эълон қилинаётган маълумотлар асоссиз ҳисобланади» — дейилади хабарда.