Иқтисодиёт ва молия вазирлиги ахборотига кўра, сўнгги пайтларда ижтимоий тармоқларда «Ташаббусли бюджет» лойиҳаларига овоз бериш эвазига пул ёки моддий мукофотлар ваъда қилувчи Telegram-ботлар фаоллашган. Лекин аксар ҳолларда ваъда қилинган маблағлар берилмаётгани бўйича фуқаролар вазирликка юзлаб шикоятлар йўлламоқда.
Расмий баёнотда таъкидланишича, ушбу схемаларда шахслар овоз тўплаш мақсадида пул ёки моддий қимматликлар ваъда қилган, кейин эса мукофотни бермаган ҳоллар қайд этилмоқда. Бу каби ҳаракатлар фирибгарлик деб баҳоланиши мумкин.
Вазирликнинг таъкидлашича, «Ташаббусли бюджет»да овоз бериш фақат «Очиқ бюджет» портали, мобил иловалар ва Telegram’даги расмий бот орқали амалга оширилади. Амалдаги тартибга кўра, овоз бериш бепул ва ҳеч қандай моддий рағбат ёки тўлов кўзда тутилмаган.
Овоз бериш жараёни 31 август куни соат 23:59 гача давом этади. Вазирлик фуқароларни фирибгарлар тузоғига тушиб қолмасликка, шахсий маълумотларни бегона шахсларга бермасликка чақирди.
«Мукофот учун эмас, ўзгариш учун овоз беринг», дейилади вазирлик баёнотида.
Аввалроқ, «Ташаббусли бюджет» дастурининг 2025 йилги иккинчи мавсумида 2024 йилнинг иккинчи ва 2025 йилнинг биринчи мавсумларида кетма-кет ғолиб бўлган 823 та маҳаллага иштирок этишда танаффус берилиши хабар қилинган эди.
Шунингдек, Андижоннинг Олтинкўл ва Улуғнор туманлари «Ташаббусли бюджет»нинг 2-мавсумида овоз бериш жараёнларидан тўлиқ четлатилган эди. Ушбу туманларда ишчи комиссиялар томонидан лойиҳалар асоссиз рад этилгани аниқланган.