Япония ташқи ишлар вазири Такэси Ивая 26–27 август кунлари Ўзбекистонга келди. 27 август куни у Тошкентда ТИВ раҳбари Бахтиёр Саидов билан учрашиб, икки давлат вазирлари ўртасида стратегик мулоқот бошланганини эълон қилди ва унинг илк йиғилишини ўтказди. Йиғилиш якунлари бўйича 16 банддан иборат қўшма баёнот қабул қилинди.
Баёнотга кўра, вазирлар Япония ва Ўзбекистон ҳамкорлигининг мавжуд даражаси ва изчил ривожланишини эътиборга олиб, стратегик мулоқотни йўлга қўйишга қарор қилган. Шунингдек, 2019 йил 19 декабрда қабул қилинган «Стратегик шерикликни янада чуқурлаштириш ва кенгайтириш тўғрисида»ги қўшма баёнотдан сўнг жараён янги суръат олгани қайд этилган.
Шу куннинг ўзида Такэси Ивая Шавкат Мирзиёев билан ҳам учрашганди. Учрашувда икки давлат стратегик шериклигини янада мустаҳкамлаш, иқтисодий ва маданий ҳамкорликни кенгайтириш масалалари муҳокама этилган.
Ўзбекистон–Япония маркази фаолиятини кенгайтириш ҳамда унинг негизида япон университетлари иштирокида қўшма университет ташкил этиш режаси ҳам қўллаб-қувватланган. Шунингдек, икки мамлакат ташқи ишлар вазирларининг Стратегик мулоқоти биринчи йиғилишининг самарали натижалари ҳам айтиб ўтилган.
Япония ТИВ матбуот котиби Китамура Тошиҳиронинг айтишича, Такэси Иваянинг сафаридан мақсад минтақа билан мулоқотни жонлантириш ва ҳамкорликни кучайтиришдан иборат. Ўтган йилнинг август ойи охирида ўша вақтдаги ҳукумат раҳбарининг зилзила ва цунами хавфи сабаб қолдирилган ташрифи ҳамда «Марказий Осиё+Япония» саммити масалалари муҳокама қилинган.
Япон расмийларининг маълум қилишича, қолдирилган «Марказий Осиё+Япония» саммитига тайёргарлик давом этмоқда, аммо аниқ сана ҳали белгиланмаган.
Маълумот учун, Такэсининг вазир сифатида Марказий Осиё минтақасидаги илк бор ташрифи бўлди; у аввал Қозоғистонга борган, 27 август куни эса Тошкентда 16 банддан иборат қўшма коммюникени имзолаган.
Матбуот котиби Китамура Тошиҳиронинг таъкидлашича, Япония Ўзбекистонга инсон капиталини ривожлантириш учун икки йўналишда грант ажратади. Биринчиси давлат хизматчиларини Японияда ўқитишга, иккинчиси эса БМТТД доирасида Сурхондарёда касбий таълимга қаратилади.
Аммо Япония виза олиш тартибини енгиллаштириш ёки тўғридан-тўғри авиарейсларни кўпайтиришни режалаштирмаяпти, чунки саёҳат визаси билан келиб қолиб кетувчи мигрантлар сони кўпаймоқда. Китамура Тошиҳиро:
«Япония аҳолиси 124 млн нафар бўлиб, кейинги 50 йилда 70–80 млнга тушиб кетиш эҳтимоли бўлса ҳам, мамлакат чет эллик ишчи кучини қабул қилишга шошилмади ва бунга эҳтиёткорлик билан ёндашади» — дейди.
Китамура Тошиҳиро сўнгги 15 йилда Японияда бир нечта бош вазир алмашган бўлса-да, Марказий Осиёга нисбатан сиёсат ўзгармагани, «Марказий Осиё+Япония» формати ҳам давом этиши ҳақида айтиб ўтган.
Токио асосий урғуни иқтисодий ривожланишга бермоқда, ҳарбий ҳамкорлик ёки қўшма машғулотлар масалалари муҳокама қилинмаган.