Ўзбекистоннинг олтин-валюта захиралари тарихда илк бор 48 миллиард доллардан ошди. Бу ҳақда президент Шавкат Мирзиёев «Янги Ўзбекистон» боғида бўлиб ўтаётган давлат мустақиллигининг 34 йиллигига бағишланган байрам тадбирида маълум қилди.
Президентга кўра, ўтган саккиз йилда мамлакатга қарийб 130 миллиард доллар хорижий инвестициялар кириб келган.
Мирзиёевга кўра, кейинги саккиз йилда ялпи ички маҳсулот 2 карра ошиб, ўтган йили 115 миллиард долларга, экспорт ҳажми 26 миллиард долларга етган. Таъкидланишича, йил якуни билан ялпи ички маҳсулот 130 миллиард доллар бўлади.
«Буларнинг барчаси ислоҳотлар самараси, тараққиётимизнинг мустаҳкам кафолати, нуфузли молия институтлари ва хорижий компанияларнинг юксак ишончи туфайлидир», — деди Мирзиёев.