Россия ҳукумати биринчи бор ҳарбий харажатларга федерал бюджетга тушган ҳар иккинчи рублни йўналтирди. Германиядаги Халқаро хавфсизлик муаммолари институти таҳлилчиси Янис Клюге маълумотларига кўра, 2025 йил биринчи чорагида давлат бюджети даромадларининг 50,1 фоизи, иккинчи чоракда эса 48,2 фоизи уруш учун сарфланган.
Солиштириш учун: 2022 йилда бу кўрсаткич 24,4 фоиз, 2023 йилда — 32,05 фоиз, 2024 йилда эса 39,05 фоиз бўлган. Илгари қайд этилган энг юқори кўрсаткич 2023 йил биринчи чорагида 45,4 фоиз бўлган эди.
Уруш харажатларининг умумий харажатлардаги улуши бундан камроқ, чунки бюджет дефицитда. Жорий йилнинг олти ойида Молия вазирлиги 17,584 трлн рубл йиғиб, 21,278 трлн рубл сарфлаган. Бунинг 39,9 фоизи ҳарбий мақсадларга тўғри келади.
Бу кўрсаткичлар Россиянинг замонавий тарихидаги мутлақ рекорд саналади ва ҳатто совет иттифоқи пароканда бўлишидан аввалги йиллардаги даражадан юқори. Масалан, 1990 йилда уруш учун 29,4 фоиз маблағ ажратилган эди.
2025 йилнинг январ–июн ойларида Кремл мудофаа мақсадларига 8,484 трлн рубл сарфлаган. Бу ўтган йилга нисбатан 31 фоизга, 2023 йилнинг шу даврига нисбатан эса 95 фоизга кўп. 2022 йил билан таққосланганда — уч баробар ўсиш қайд этилган.
Дастлабки бюджет режасига кўра, «миллий мудофаа» учун 13,5 трлн рубл ва «миллий хавфсизлик» учун 3,459 трлн рубл ажратилган. Бу ЯИМнинг тахминан 8 фоизини ташкил этарди, аммо амалда бу рақам юқорироқ бўлади.
Reuters агентлиги манбасининг таъкидлашича, ҳатто уруш фаол фазаси тугаса ҳам, Кремл ҳарбий харажатларни 2026 йилда қисқартиришни режалаштирмаяпти. Сабаби — дронлар ва снарядлар ишлаб чиқариш давом этади. «Ғарб ҳарбий харажатларини ошираётган бир пайтда, Россия ҳам ортда қолмаслиги керак», — деди манба.
2027 йилда уруш тугаса, ҳарбий харажатлар бироз қисқариши мумкин. Аммо «махсус ҳарбий амалиёт»гача бўлган даражага тушиши кутилмаяпти.