АҚШ президенти Доналд Трамп 25 август куни Федерал резерв тизими (ФЗТ) Бошқарув кенгаши аъзоси Лиза Кукни ишдан бўшатгани ҳақида баёнот берди. У ўзининг Truth Social ижтимоий тармоғида тегишли хат сканерини ҳам эълон қилди. Унга кўра, Кук ипотека кредитлари бўйича «қабиҳ ниятда ёлғон маълумот берган» бўлиши мумкин.
CNN таъкидлашича, ФРС тарихи давомида бундай ҳолат сўнгги 111 йилда илк бор рўй берди. Лиза Кук эса ўз баёнотида Трампнинг бундай қарор қабул қилишга ваколати йўқлигини билдирди. «Мен истеъфога чиқмайман, ишимни давом эттираман», — деди у.
Қонунга кўра, ФЗТ раҳбарларини ишдан олиш фақат «узрли сабаб» билан амалга оширилиши мумкин. Аммо ушбу ҳолда айнан қандай сабаб келтирилгани расман аниқ эмас. Кукка нисбатан ҳозирча ҳеч қандай расмий айблов қўйилмаган.
Бундан аввал, 15 август куни Федерал уй-жой молиялаш агентлиги раҳбари Билл Пулте Кукка қарши тергов ўтказишни сўраб Бош прокурорга мурожаат қилган. Унга кўра, Кук иккита доимий яшаш манзили ҳақида нотўғри маълумот берган бўлиши мумкин.
Мутахассислар ушбу воқеа судгача бориши ва ҳатто АҚШ Олий судида кўриб чиқилиши мумкинлигини айтмоқда. Бу эса молия бозорларида беқарорликка олиб келиши мумкин.
Трамп бир неча бор ФЗТ устидан босим ўтказган. Жумладан, у ФЗТ раиси Жером Пауэллни ишдан олиш билан таҳдид қилган. Трампнинг фикрича, инфляция деярли йўқ ва ставкаларни дарҳол пасайтириш керак. Молиявий экспертлар эса бу босим ФЗТ мустақиллигига таҳдид солиши ва иқтисодий барқарорликни хавф остига қўйишини таъкидламоқда.