Лицензиялар ўйини: Олий таълим вазирлиги ёлғончими?
Бугун, 29 август куни Олий таълим, фан ва инновациялар вазирлиги бешта университетга бир нечта қўшимча йўналишлар бўйича берилган лицензияларни техник хатолик, деб эълон қилган эди. Лекин, Адлия вазирлиги тегишли тизимда носозлик бўлганини рад этди.
Олий таълим вазирлигига кўра, 29 август куни соат 06:19 дан 09:53 гача license.gov.uz ахборот тизимида юзага келган техник носозлик сабабли, кўриб чиқиш муддати тугамаган аризалар бўйича айрим нодавлат олий таълим ташкилотларининг амалдаги лицензияларига ўзгартириш киритиш ҳақидаги сўровларига тизим томонидан белгиланган талаб бузилган ҳолда ижобий хулосалар шакллантирилган.
«Лицензия» ахборот тизими (license.gov.uz)да техник носозликлар ҳамда рухсат этилмаган ҳаракатлар кузатилмаган ва тизим штат режимида ишлаб турибди», – дейилади Адлия вазирлиги баёнотида.
Қайд этиш керак, бу Олий таълим, фан ва инновациялар вазирлиги томонидан нодавлат ОТМга техник хатолик оқибатида лицензия берилгани айтилган илк ҳолат эмас. 2024 йилнинг 21 август куни «Абу Райҳон Беруний университети» НТМга лицензия берган вазирлик бир ой ўтгач бу лицензия «тизимда юзага келган техник носозлик сабаб хато берилган»ини маълум қилганди.
Мирзиёев Ўзбекистоннинг Фаластин борасидаги позициясини қайта эслади
Ўзбекистон Фаластин халқи Бирлашган Миллатлар Ташкилоти резолюциялари билан тасдиқланган ҳуқуққа, яъни ўзининг мустақил давлатини барпо этиш ҳуқуқига эга, деган қатъий позицияда. Бу ҳақда президент Шавкат Мирзиёев «Янги Ўзбекистон» боғида бўлиб ўтаётган давлат мустақиллигининг 34 йиллигига бағишланган байрам тадбирида сўз очди.
«Афғонистон минтақавий ва глобал хавфсизликнинг муҳим омили эканидан келиб чиқиб, ушбу мамлакатнинг ҳукумати билан конструктив ва амалий ҳамкорлик олиб бориш зарур, деб биламиз. Биз Фаластин халқи Бирлашган Миллатлар Ташкилоти резолюциялари билан тасдиқланган ҳуқуққа, яъни ўзининг мустақил давлатини барпо этиш ҳуқуқига эга, деган қатъий позициямизни яна бир бор билдирамиз»,
– деди президент.
Марказий Осиёда хусусий мактаблар: энг қиммат нарх Ўзбекистонда
Минтақада хусусий мактаблар сони тез ортиб бораётган бўлса-да, уларнинг нархи аҳолининг ўртача даромадига нисбатан жуда юқори. Хусусий мактабларнинг кўпайиши нафақат ота-оналарнинг сифатли таълимга бўлган эҳтиёжи, балки бозорнинг ривожланиши билан ҳам боғлиқ. Энди улар оддий дастурлардан ташқари халқаро йўналишларни ҳам таклиф қилишмоқда, жумладан Кембриж ва Оксфорд дастурлари. Лекин шунга яраша нархлар ҳам ошмоқда.
Ўзбекистон ҳозирда бир вақтнинг ўзида энг қиммат ҳамда энг арзон хусусий мактабларга эга мамлакат бўлиб турибди. Қирғизистон ва Қозоғистонда мактаблар нархи нисбатан мувозанатлироқ, лекин барибир оилаларнинг ўртача даромадидан анча юқори. Тожикистонда эса вазият янада оғир: ҳатто йилига бир ярим минг долларлик энг арзон таълим нархи ҳам аҳолининг йиллик маошидан бир неча баравар кўп. Батафсил мақоламизда билиб олишнгиз мумкин.
Кузнинг илк ойи қандай об-ҳавода ўтади?
Жорий куз фаслининг илк ўн кунлигида Ўзбекистонда асосан кам булутли ва қуруқ об-ҳаво кузатилиши кутилмоқда. Кечалари ва эрта тонгда ҳарорат +15…+20 даража атрофида, кундуз кунлари эса қуёшли ҳавода +35…+37 даражагача исиши мумкин. Сентябр ойи давомида ҳарорат кечалари +8…+13 даражагача, кундуз кунлари эса +20…+25 даражагача тушиб, айрим кунларда қисқа муддатли ёмғир ёғиши мумкин. Илгари кузатувлар шуни кўрсатганки, ойнинг биринчи ярмида ўртача кундузги ҳарорат +30…+33 даража, иккинчи ярмида +26…+29 даража бўлган, энг юқори ҳарорат эса баъзи ҳудудларда +41…+43 даражага етган.
Сентябр ойи Ўзбекистонда йилнинг энг қуруқ ойларидан бири ҳисобланади, ёмғир камдан-кам (ойига 1-3 марта) ёғади. Ойлик ёғингарчилик текислик ҳудудларда 1–5 мм, тоғларга яқин ҳудудларда 6–10 мм, айрим тоғли жойларда эса 15–30 мм ни ташкил этади. Айрим йилларда бутун республикада ёмғир умуман тушмаган, аммо баъзи кунларда бир неча баробар кўп ёғингарчилик кузатилган ҳолатлар ҳам қайд этилган. Шундай қилиб, сентябр ойи одатда иссиқ ва асосан қуруқ, лекин қисқа муддатли ёмғирлар эҳтимоли ҳам мавжуд.
Захарова Шавкат Мирзиёевнинг Россиянинг душманлари билан алоқалари юзасидан баёнот берди
Россия Ташқи ишлар вазирлиги расмий вакили Мария Захарова Ўзбекистон президенти Шавкат Мирзиёевнинг Киев ва Боку ҳақидаги фикрларига муносабат билдириб, Ўзбекистоннинг мустақил ва суверен давлат эканини таъкидлади. Унинг сўзларига кўра, Ўзбекистон ташқи сиёсатини мустақил равишда олиб боради ва яқин ҳамда узоқ қўшнилар билан дўстона ҳамкорликни мустаҳкамлашга ҳаракат қилади.
Захарова шу билан бирга, Москва ва Тошкент муносабатлари стратегик шериклик ва дўстона, ўзаро манфаатли хусусиятга эга эканини қайд этди. Бу баёнот Ўзбекистон президентининг илгари озарбайжонлик ҳамкасби Илҳом Алиевнинг сиёсатини мақтагани ва Украина президенти Владимир Зеленскийни Украина Мустақиллик куни билан табриклаганидан сўнг берилди.