Лвив шаҳрида Украина Олий Радасининг собиқ спикери Андрий Парубий отиб ўлдирилди. Унинг ўлдирилганини Украина ички ишлар вазири ва Бош прокурори тасдиқлади. Президент Володимир Зеленский ҳам Парубийнинг ўлими ҳақида баёнот берди.
Полиция маълумотига кўра, отишма шаҳарнинг Сихов районида маҳаллий вақт билан туш пайти содир бўлган. Гумонланувчи ҳужумчи ҳали қўлга тушмаган: у курйер формасида бўлган ва Парубийга бир неча марта ўқ узган. Жиноятдан сўнг у электровелосипедда ҳодиса жойидан қочган.
Андрий Парубий 1971 йил 31 январ куни Лвив вилоятининг Червоноград шаҳрида туғилган. У 2016–2019 йилларда Украина парламенти — Олий Рада раиси сифатида фаолият юритган. 2014 йилда миллий хавфсизлик ва мудофаа кенгаши котиби вазифасида ишлаган.
Парубий 2014 йилги Евромайдан пайтида намойишчилар лагерининг коменданти ва «Майдон ўзини ўзи ҳимоя қилиш» жамоат ташкилоти раҳбари бўлган. 1980-йиллар охирида Украинадаги миллий озодлик ҳаракатларида қатнашган ва совет тузумига қарши чиқишлари учун икки марта қамоққа олинган.
2007 йилдан буён Олий Рада депутати бўлган, парламентнинг VIII ва IX чақириқларида фаолият юритган. 2014–2016 йилларда парламент раисининг биринчи ўринбосари сифатида ишлаган. Евроинтеграция, НАТО билан ҳамкорлик ва парламентлараро алоқалар масалаларида фаоллик кўрсатган.
Ҳозирда уни ўлдирган шахсни қидириш ишлари давом этмоқда.