Президент Шавкат Мирзиёев 30 августдан 3 сентябргача Хитой Халқ Республикасига расмий ташриф буюради. Бу ҳақда давлат раҳбари матбуот хизмати хабар берди. Ташриф Хитой раиси Си Жинпингнинг таклифига биноан амалга оширилади.
31 август — 1 сентябр кунлари Мирзиёев Тианжин шаҳрида ўтадиган Шанҳай ҳамкорлик ташкилоти давлат раҳбарлари кенгаши йиғилишида ҳамда «ШҲТ плюс» форматидаги саммитда иштирок этади.
Кун тартибида хавфсизлик, рақамли иқтисодиёт, яшил саноат, энергетика, туризм ва бошқа соҳалардаги ҳамкорликни ривожлантириш масалалари муҳокама қилинади. Саммит якунида Тианжин декларацияси ва бир қатор қўшма ҳужжатлар қабул қилиниши кутилмоқда.
2 сентябрь куни Пекинда Шавкат Мирзиёев Си Жинпинг билан икки томонлама музокаралар ўтказади ва Хитойнинг етакчи компаниялари раҳбарлари билан учрашади. Томонлар ҳар томонлама стратегик шерикликни мустаҳкамлаш ва янги амалий лойиҳаларни муҳокама қилади.
3 сентябрда эса президент Иккинчи жаҳон урушида қозонилган Ғалабанинг 80 йиллигига бағишланган расмий тадбирларда иштирок этади.