«Юксалиш» ҳаракати ва Марказий Осиё сунъий интеллект ассотсиацияси (AICA) ҳамкорлигида Ўзбекистонда сунъий интеллект (СИ) соҳаси ривожига ҳисса қўшаётган илк миллий «Sun’iy intellekt liderlari – TOP-30» рўйхати тузилди. Унда олимлар, мутахассислар ва фаоллар номзод сифатида қайд этилди.
Сунъий интеллект мамлакатда рақамли тараққиётнинг янги босқичини бошлаб бермоқда. 2024 йилда Президент Шавкат Мирзиёев ташаббуси билан «2030 йилгача СИ технологияларини ривожлантириш стратегияси» қабул қилинди. Ҳужжат доирасида 1,5 млрд долларлик СИ маҳсулотлари яратиш, халқаро рейтингда дунёдаги илғор 50 мамлакат қаторига кириш ва кадрлар салоҳиятини ошириш белгиланган.
Ўзбекистонда MyID, UzFace, Palm Pay каби СИ ечимлари амалиётда жорий этилмоқда. AI readiness индекс бўйича Ўзбекистон 17 поғонага кўтарилиб, Ҳиндистон ва Туркияни ортда қолдирди. Шу билан бирга, стартап ва инновацион лойиҳаларни қўллаб-қувватлаш механизмлари йўлга қўйилмоқда.
Рейтингнинг мақсади — соҳадаги фаол шахсларни жамоатчиликка танитиш, ютуқларини эътироф этиш, илғор тажрибани оммалаштириш ва ёшларни илмий-технологик соҳаларга жалб этишдир. Рейтинг икки босқичда шакллантирилди: дастлаб 50 номзод сараланди, сўнг 1380 нафар AICA резиденти томонидан 8 мезон асосида баҳоланди.
Рўйхатга киритилган етакчилар орасида MyTaxi, Express24, Workly ва Maxtrack хизматлари асосчиси Акмал Пайзиев ҳам бор. Mohirdev платформаси асосчиси Анвар Нарзуллаев эса СИни таълим соҳасига жорий этмоқда. Шунингдек, Бунёдбек Иброҳимов ва Дилноз Муҳаммадиева каби тадқиқотчилар СИ соҳасида назарий ва амалий ишларни олиб бормоқда.
Бу рўйхат нафақат соҳадаги фаолиятни рағбатлантиради, балки илмий ва технологиявий ривожланишга хизмат қилади.