Ўзбекистон Президенти Шавкат Мирзиёев 29 август куни Мустақилликнинг 34 йиллигига бағишланган тантанали тадбирда нутқ сўзлади. Президент матбуот хизмати нутқ матнини эълон қилди.
Мирзиёев сўзларига кўра, республика иқтисодиёти жаҳондаги мураккаб шароитларга қарамасдан йилига 6 фоиздан зиёд ўсмоқда. 2017 йилдан буён Ўзбекистонга 130 млрд доллар хорижий инвестиция киритилган. ЯИМ икки бараварга ўсиб, 115 млрд долларга етган. 2025 йил якунида ушбу кўрсаткич 130 млрд долларгача етиши кутилмоқда.
Президент йил бошидан бери мамлакатда 5 млн киши иш билан таъминланганини, шундан 700 минг меҳнат мигранти қайтганини маълум қилди. Бу натижалар олиб борилаётган ислоҳотларнинг самарадорлигидан далолат бериши қайд этилди.
Доимий иш ўринлари яратиш учун йил охиригача 9 мингта янги корхона ташкил этилиши ва уларга 35 млрд доллар инвестиция жалб қилиниши режалаштирилган. 2026 йилга келиб электр энергияси ишлаб чиқариш ҳажми 85 млрд kWh дан 97 млрд kWh гача оширилиши мақсад қилинган.
«Яшил энергетика» устувор йўналиш бўлиб қолмоқда: 2024 йилда қайта тикланувчи манбалардан 6,5 млрд kWh энергия олинган. 2030 йилгача бу соҳага 35 млрд доллар инвестиция жалб этилиб, яшил энергия улуши 54 фоизга етказилиши режалаштирилган.
Туризм соҳасида ҳам ўсиш кузатилмоқда: 2024 йилда 10 млн турист мамлакатга ташриф буюрди, хизматлар экспорти эса 3 млрд долларга етди. Шаҳарлар инфратузилмасини яхшилаш ва архитектура меросини тиклаш орқали соҳа янада ривожлантирилади.
Ижтимоий соҳада давлат томонидан 19 трлн сўм йўналтирилган. Бу маблағлар 2,5 млн эҳтиёжманд оила аъзоларига 110 турдаги хизмат ва ёрдам кўрсатишга сарфланган. Камбағаллик даражаси 6,8 фоизгача туширилган.
Соғлиқни сақлашга ажратиладиган маблағлар 6 баравар ошган. 400 дан ортиқ тиббий хизмат энди Тошкент эмас, балки вилоятларда ҳам кўрсатилаётгани айтилди. Ўртача умр кўрсаткичи 75 ёшдан ошган. Президент таълим ва тиббиёт соҳаларига барча ресурсларни сафарбар этишини билдирди.