Россияда август ойи давомида дронлар ҳужумлари туфайли бешинчи йирик нефтни қайта ишлаш заводи — Куйбишев НҚИЗ ишини тўхтатди. Бу ҳақда Reuters агентлиги соҳадаги манбаларига таяниб хабар берди.
Маълумотларга кўра, 28 август куни юз берган ҳужум натижасида йилига 7 млн тоннани қайта ишлаш қувватига эга бўлган заводнинг икки асосий қайта ишлаш қурилмаси ишдан чиққан. Уларнинг ҳар бири кунига 10 минг тонна нефтни қайта ишлаш имкониятига эга эди.
Куйбишев НҚИЗ «Роснефт»нинг Самара гуруҳига киради ва ўтган йил 800 минг тонна бензин ҳамда 1,3 млн тонна дизел ёқилғи ишлаб чиқарган. Манбаларга кўра, ҳужум натижасида иккинчи даражали қайта ишлаш жараёнлари ҳам зарар кўрган.
Бу ойда ҳужумлар туфайли ишини тўхтатган бошқа заводлар қуйидагилар: 2 август куни — Новокуйбишев НҚИЗ, 11 август — Саратов НҚИЗ, 15 август — Волгограддаги «Лукойл» заводи ва Сизрандаги завод. Шунингдек, Рязан шаҳридаги «Роснефт»га қарашли энг йирик завод ҳам қувватларининг ярмини тўхтатган. Новошахтинскдаги НҚИЗ эса 5 кун давомида ёнғин билан курашган, ҳозирги ҳолати ноаниқлигича қолмоқда.
Reuters таҳлилларига кўра, дронлар ҳужумлари оқибатида Россия нефт компаниялари умумий қайта ишлаш қувватларининг 17 фоизини йўқотган. Фақатгина августда 6,4 млн тонна қувват фаолиятсиз қолиб, бу тарихий рекорд даражасига етган — 23 фоиз.
Шу билан бирга, манбалар маълум қилишича, ҳозирча мамлакатда ёнилғи ишлаб чиқариш сезиларли камаймаган — августда фақат 5 фоизга пасайган. Бунга зарар кўрмаган заводлар иш юкини кўпайтириб, вазиятни қисман барқарорлаштиргани сабаб бўлган.