Озарбойжон президентининг Қарабоғ бўйича махсус вакили Эмин Ҳусейновнинг маълум қилишича, сентябр ойидан бошлаб қайта тикланаётган Ағдам шаҳрига озарбойжонлик фуқароларни кўчириш бошланади. Унга кўра, шаҳарнинг тарихий маркази 2026 йил охиригача тўлиқ тикланади.
«Ағдамда тиклаш ишлари жадал кетмоқда. Инфратузилма бўйича жиддий қурилиш ишлари олиб борилмоқда», — дея Ҳусейновнинг сўзларини келтирмоқда Report нашри.
Шунингдек, Озарбойжон темир йўллари раҳбари Нижат Қулиев 30 август куни Бокудан Ағдамга илк йўловчи поезди жўнаб кетганини маълум қилди. Бу йўналишда рейслар 32 йилдан бери амалга оширилмаган эди.
2024 йилда Хонкенди шаҳрига ҳам фуқароларни қайта жойлаштириш ишлари бошланган. Қарабоғ ҳудуди 2023 йилда Арманистон билан бўлган урушдан сўнг тўлиқ Озарбойжон назоратига ўтган эди.
Ағдам шаҳри бугунги кунда қайта тикланиш жараёнидаги муҳим стратегик ҳудудлардан бири ҳисобланади. Ҳукумат инфратузилмани тўлиқ янгилаш, тураржойлар ва ижтимоий объектларни қайта қуриш, шаҳарга ҳаётни қайтаришни мақсад қилган. Маҳаллий ва марказий ҳокимиятлар аҳолини жойлаштириш билан бирга, иш ўринлари яратиш ва иқтисодий фаолликни тиклашга ҳам эътибор қаратмоқда.