Ўзбекистон президенти қарорига мувофиқ, 2026 йилдан «Ташаббусли бюджет» тизимида янги қоидалар амалга киритилади. Янги тартибга кўра, маҳаллий кенгаш депутатлари ўз сайлов округларида ғолиб бўлмаган иккита лойиҳани шахсан танлаш ва уларни ғолиб деб эълон қилиш ҳуқуқига эга бўлади.
Бу тартиб доирасида танланган лойиҳалар учун максимал молиялаштириш миқдори 8 минг баробар БҲМ ёки тахминан 3,3 млрд сўм этиб белгиланди. Бу амалиёт депутатлар орқали аҳоли эҳтиёжларини тўғридан-тўғри ҳисобга олиш имконини кенгайтириши кутилмоқда.
Шунингдек, 2026 йилдан бошлаб ижтимоий масалаларга оид лойиҳаларни аҳоли ва давлат ўртасида шериклик асосида молиялаштириш тартиби ҳам жорий этилади. Агар маҳалла ёки фуқаролар лойиҳа қийматининг 50 фоизини ихтиёрий равишда қопласа, лойиҳа автоматик равишда ғолиб деб топилади ва қолган 50 фоиз маблағ давлат бюджети ҳисобидан ажратилади.
Иқтисодиёт ва молия вазирлиги кейинги янгилик аҳоли орасида мазкур ўзгариш «энди овоз бериш амалиёти бекор қилинади», деган нотўғри тушунчаларга сабаб бўлаётганини таъкидлаган. Бюджет жараёнига масъул идоралар бу ҳолатни рад этиб, анъанавий овоз бериш тартиби ўз кучида қолишини ва энг кўп овоз тўплаган лойиҳалар, аввалгидек, ғолиб деб топилишини тасдиқлади.
Янги тартиблар асосий жараёнга қўшимча сифатида жорий этилади. Бунда фаол маҳаллалар ўз ташаббусларини қисман молиялаштириш орқали имкониятларини оширишлари мумкин. Ҳар бир маҳалла ўз имкониятига қараб анъанавий ёки шериклик модели орқали иштирок этиш ҳуқуқига эга бўлади.
Эслатиб ўтамиз, 2025 йилги «Ташаббусли бюджет»нинг иккинчи мавсуми учун овоз бериш жараёнлари давом этмоқда. Овоз бериш 31 август 23:59 да якунланади.