Тошкент шаҳар ҳокими қарорига кўра, 10 ва 11-синф ўқувчилари учун «Smart School» электрон дастури асосида махсус кузатув тизими йўлга қўйилади. Дастур аввал амалиёт тариқасида Олмазор туманида жорий этилади. Унга кўра, 31 та умумтаълим мактабидаги 250 та синфда камералар ўрнатилади.
Махсус технология орқали синфларда давомат доимий назорат қилинади, ўқувчиларнинг фанларга қизиқиши ўрганилади. Шунингдек, сунъий интеллект ёрдамида ўқувчиларнинг руҳий ҳолати таҳлил қилиниб, ўқитувчиларнинг педагогик салоҳияти баҳоланади.
Ҳужжатга кўра, кузатув тизимини ўрнатиш харажатлари туман маҳаллий бюджетидан қопланади. Лойиҳа мактабларда таълим сифати ва тарбия самарадорлигини оширишга қаратилган.
Маълум қилинишича, мазкур таклиф Тошкент шаҳар ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари томонидан илгари сурилган. Ҳозирда дастурнинг бошланғич босқичи бўйича ишлар олиб борилмоқда.