Унда кийим-кечак, пойабзал, заргарлик буюмлари, маиший техника ва косметика маҳсулотлари савдога қўйилган. Қўмита маълумотича, маҳсулотлар асосан Хитой, Туркия ва БААдан олиб кирилган бўлиб, улар суд қарорлари асосида давлат мулкига ўтказилган.
Ярмарка илк бор кенгайтирилган тартибда ташкил қилингани қайд этилмоқда.
Божхона қўмитаси вакили Шаҳбоз Юсуповнинг таъкидлашича, товарлар божхона тўловидан қочиш ёки яшириш ҳолатларида мусодара қилинади. Улар экспертиза ва баҳолашдан ўтгандан сўнг суд қарорлари билан давлат даромадига ўтказилади. Яроқли маҳсулотлар сотувга чиқарилиб, сифатсизлари йўқ қилинади. Биринчи марта қонунбузарликка йўл қўйган тадбиркорларга эса товарлари қайтарилиши мумкин.
Мусодара қилинган товарларни сотиш билан 2022 йилда ташкил этилган «Божхона-сервис» давлат муассасаси шуғулланади. Унинг ҳар бир вилоят марказида махсус дўконлари мавжуд. Тошкентдаги асосий нуқта ҳам «Uchtepa Outlet Centre» ҳудудида жойлашган.
Қўмита маълумотича, ярмарканинг илк кунида 150 млн сўмлик маҳсулот сотилган. Тушумнинг асосий қисми ҳукумат қарорига кўра, аҳолини ижтимоий қўллаб-қувватлаш дастурларига — «темир дафтар» ва «аёллар дафтари»га йўналтирилади. 2025 йилнинг 7 ойида судлар қарори билан 10 млрд сўмлик товар мусодара қилингани маълум қилинди.